Balei thep kam ha ka Tnat Pulit shibun shibun, hynrei ïa kiwei pat ki tnat kam don ka jingpynkhlaiñ

La ïohi na ka por sha ka por, ba ka sorkar jylla, ka ju pynbna, ban thung bad ban pyndap ïa ki kam pulit bapher ha ka jylla bad kiba bun ki samla khlem kam, ki ïa beh ïa kitei ki kam, na ka bynta ban ïa ïoh kamai kajih bad ban ïa kyrshan ïa la ka ïing ka sem.
Ka jingkylli pat ka mih, ba balei sha, ka sorkar jylla, ka tyrwa kam tang ban long pulit bad lehse ïoh ka kwah ban pynduh lut noh ïa kine ki nongtrei sengbhalang, ba kin nym lah shuh ban pyni bor ïa ka sorkar jylla, ha ki ishu bapher, da kaba ïalade kin hap ban phong sopti pulit, bat lathi lane suloi AK 47 bad ban ïa pyni bor pyrshah ïa ki hynmen ne ki para la jong?
Ki don ki tnat sorkar kiba dei ban pynkhlaiñ tyngeh ïa ki jingtreikam jong ki bad kawei na kitei ka dei ka tnat pule puthi, ha kaba ka jinghiar jong ka jingpule, ka la jubor haduh katta katta, hynrei hangtei ym don ba thung nonghikai bad lada thung 1000 ngut, kata ka pyni, ba ka la dei ka jingtrei kaba radbah haduh katta katta (katba ïa ki pulit, la dep thung imat kumba 3000 ngut antad), nangta ka don ka tnat ka koit ka khiah, kaba shu shah thad lynter, kat shaba leit bad katei ka donkam ban thung nongtrei ha ki Health Centre, ki PHC bad ki CHC, hynrei la ïohi, ba ïa kitei la nang ai ei noh sha ka sorkar India, ha kaba la pynkylla sha ki Wellness Centre bad wanrah ïa ki rynjaiñ rynjep, ba kin ïa khem met ha kitei ki hospital.
Ka tnat bording, ka dei kaba ai jingshakri kaba donkam bha, hynrei tang ban lum bill light ruh, katei ka tnat kam don nongtrei bad la hap ban shu ai kontrak ïa ki poiwir poihap suda.
Ka tnat rep, ka dei sa kawei pat ka tnat kaba da donkam palat, hynrei ka jingthung nongtrei kam don eiei satia bad kumta ka donkam ban mih ka jingkylli, ba balei sha ïa kitei ki tnat bapher, ba la shu ieh khongreng, katba tang ïa ka tnat pulit, ba la ïai thung kam na ka por sha ka por? Bad tang leit ai jingïada sha Lapangngap ruh kim lah ki pulit jylla, hynrei ki nong Lapangngap pat ki hap ïada hi ïalade, wat tang ban rep sha jaka la jong ruh ka Sorkar ha jaka ban ïada hynrei la ailang ïa ki karbi kiba shu wan naei naei.
Ka jingroi jong ka jylla, kam shong ha ka tnat pulit, kaba leit kem nonglute, kaba leit kem nongpynïap briew, kaba leit khang lynti ïa ki nong ïakhih paidbah (wat la katei ka dei ka bynta ban teh lakam ïa ka suk ka saiñ), hynrei ka jingroi ka donkam eh ïa ka jingdon jong ki nongshong shnong ïa ki kam ki duk kiba biang, lada dei ki kam sorkar lane ki kam lajong; hynrei kumba ka paw ha kine ki sngi, la ïohi, ba ki samla ki bun tang ki kam ïakhih paidbah, namar ba kim don lad ha ka ïohkam ïoh jam bad ki ïohi ruh ba ka sorkar jylla, ka shu beiñ beiñ ïa ki duk ki raitoi, lada dei ha ka ïohkam ïohjam, lada dei ha trei kam lajong, ha kaba kiba duk ha ka kutlad, ki la die duh ia ki jaka lajong sha ki kompeni heh bad nangta sa kiba bylla sngi, ki shah beh thong, tang na ki jaka die madan ruh.
Kane ka jingleh ka sorkar ka buh jingeh shibun ïa kiwei ki tnat kiba mad ki jingeh ha kiba bun ki liang bad dei hangne ba bun ki tnat ba la kdew haneng kim lah satia ban treikam bha naba ka sorkar kam pynbha satia ïa kiwei ki tnat.
Dei halor kane ba bun na ki nongshong shnong ki mad ki jingeh kiba bun naba ym don kiba shim khia bad shibun ba ka sorkar ka kwah ban pynbha ïa kawei ka tnat kadei ruh ban shim khia ruh ïa baroh ki tnat khamtam eh kito kiba kongsan kiba kloi ban ai ki lad jingshakri kaba bha ïa ki nongshong shnong ka jylla bad lada ka ïaileh shilliang tang ïa kawei ka tnat kaba mut ba ka sorkar kam don ka don ban pynbha ïa ka roi ka por ha ka jylla.
Ngi lah ban ong ba ka jingshakri jong ka sorkar bad kwah ban pynkhlaiñ ïa ka tnat pulit da kaba them kam ïa kiba bun ym lah ban len ba kan shisha ïa ki samla hynrei ha kajuh ka por ruh ka sorkar kadei ban pynkhlaiñ lang ïa kiwei pat ki tnat sorkar bad lada kan leh lang kumne ïa kiwei pat ki tnat kan ïoh ka jingïaroh na ki paidbah nongshong shnong jong ka jylla.