Kat shaba phai la sha ka mon ne sha ka diang ka jingthnem jong ki nongkitkam jong kiwei kiwei ki seng saiñpyrthei ban phet na ka party lajong bad ban leit pynïasoh sha ka NPP ka jur bha ha kine ki khyndiat sngi. Ka lyer elekshon ka la shongshit bha sha ki jaka nongkyndong namarba ka NPP ka pynlong beit da ki jingïalang heh kiba bun briew khnang ban pyni ba ka dei ka seng saiñ kaba khlaiñ namarba ba ka dang bat ïa u lakam synshar hapoh kane ka Jylla Meghalaya.
Baroh baroh ki ïap biej ïa ka NPP. Kumba u ong u National Vice President ka NPP u Bah Prestone Tynsong, ba ka jingpynïasoh jong ki MDC na rilum Khasi bad Jaiñtia, bad kumjuh na Garo Hills sha ka NPP ka dei namarba ki ïohi ïa ki kam radbah. Ym tang katta, wat ki MLA ba la shah pynshong ben ha u paidbah ruh ki kham phaikhmat sha ka NPP ka daw ka dei namarba ki ïohi ba ka don ha ka bor synshar.
Haba bishar ïa ka jingïaphet na kawei ka seng sha kawei pat ka pyni shai ba dei tang kito ki nongtrei kiba ju sngewtynnat ban ïadon bynta ha ki seng saiñpyrthei namarba ki ïoh jingmyntoi ynda la kut ka elekhson hynrei u paidbah ba bun balang hi um da kham pynleit jingmut than eh ha kum kine ki jingïalang rung seng ne phet seng namarba um don jingphoida eiei ruh em.
U paidbah mynta u la stad bad um da donkam ban ïohsngew ïa u lane ka MLA ba kin da put ronsing ïa ki kam ba ki leh lane wat ïa kito ki MLA kiba ju ai khubor manla ka sngi ba ki ai skhim ïa ki shnong, ïa ki skul, ïa ki kynhun bad kiwei ha kiwei ha ki shnong ki thaw. U paidbah u bishar bad u da tip shai ba ki MLA kim don eiei hi ruh nalade bad ka skhim kaba ki ai ka dei hi ka jong u paidbah bad ka dei hi ka kamram jong u lane ka MLA ban pynïoh ïa kita ki song pynroi sha u paidbah namarba ki la khlei ïa ka jubanlak ha ki rynsan ïalap elekshon da kaba kular ban kit lut nadong shadong ynda ki la shah pynkup bor.
Ban shu kam trai ïa ki skhim pynroi ba u ne ka MLA ki la leh kam long kaba dei bad ka shong ha u paidbah kumno ban bishar bad u paidbah u dei ban sngewthuh shai kdar ïa ka jingmut Nongmihkhmat u dei tang u Shari hynrei um dei satia u Kynrad. Hynrei, ka synshar paidbah, ka kylla pynban da ka khongpong ba ha kaba u ne ka Nongmihkhmat ki kylla ki Lei san snem ym ki Shakri san snem.
Hadien ka jinghiar suki suki ka jingpang khlam COVID-19 hapoh kane ka jylla, ka jingtreikam bad ka dur ba shisha jong ka NPP ka la nang paw suki pa suki. Shwa u snem 2018, ka NPP ka la leit sha ki paidbah ban tyrwa ba kan weng ïa ka jingshah khang tih bad shalan dewiong ka jylla baroh kawei hynrei ki san lyiur ki la kut artat ka NPP kam shym la lah satia ban leh eiei wat tang khyndiat bad kane ka kam ka dang shu tyllun na kawei ka sngi sha kawei ka sngi kat haduh ba paw pyrthei pynban plak da ka jingshah kynnoh bamsap bad jan baroh ki kam la shu pynïaid ha ka kyrteng kita ki High Level. Ka Congress bad ka BJP ka ki ju kren pyrshah bha ïa ka bamsap ka bampoh hapoh ka Sorkar MDA haduh kine ki sngi watla ki MLA ka Congress bad ka BJP ki dei kiba ïatreilang hapoh kane ka Sorkar ba la ïalam da ka NPP.
Ka jingpyndonkam ki paidbah ka Social Media ha kine ki sngi ka long kaba shyrkhei haduh katta katta bad u paidbah hi u ïohi bad u bishar na ka sngi sha ka sngi aiu ki MLA kiba don hapoh ka Sorkar ki trei bad ki leh, la ka long ki trei bha lane ki shu trei thohmut thohmat tang ban shu pynbiej mit mit da kaba shu sam tin sop iing, sam shatri kup slap, sam shuki, sam khiew sha ki shnong ki thaw. Kine kim don jingphoida eiei ïa u paidbah namarba kine ki jingïarap kiba wan na ki MLA ki dei hi kiba la thied na ka MLA scheme.
Ka jingsahdien jong ka jylla haduh kine ki sngi ka la nang hiar arsut. Ki Sorkar ki leit bad ki wan hynrei ka jylla Meghalaya ka dang ïai sah dien hi kumjuh. Ki surok ki sah kumjuh, ym don Medical College, ym don Engineering College bad ym don eiei watla ka jylla Meghalaya ka la kynjoh sha ka rta kaba la san phew snem. Peit nuksa ïa ka jingkiew irat ka jylla Assam, ka long kaba ratbah haduh katta katta, lada synshar ka Congress lane ka BJP. Katba ha Meghalaya lada synshar ki seng riewlum lane ki seng heh nabar ka jylla ruh ym don kam pynroi eiei ruh em. Kiba phoida bad kiba myntoi dei tang kiba ïoh shong ha shuki katba u paidbah u nang ïai duk bad u im jynjar trah.
Ki jubanlak ba ki seng saiñpyrthei ki la khlei ha ki rynsan elekshon ki shu kylla mulot khlem da pyntreikam wat tang kawei ruh namarba ki jingkular ki long tang ban shu pynbiej kai ïa u paidbah.
