Ba twa khyndew bad ba sniew palat ka surok, jur ka dheng kali ha surok NH-6 Narpuh, East Jaiñtia Hills

Khliehriat, Rymphang 22 : Na ka daw ka jinghap, ka la don ka jingtwa khyndew ha surok bah national highway ha Sonapyrdi East Jaintia Hills District , myta ka sngi ha ka por kumba 11 baje mynstep, kumta ka la don ka jingsahkut ki kali ha ka jingdheng kali bad hadien katto katne kynta ynda la pynkhuid ïa ka khyndew ki kali ki la sdang ban lait suki suki.
Kumjuh ruh na ka daw ka jingdap um ka surok ha kiba bun ki bynta ha katei ka surok national highway bad ka jingsniew palat ka surok ha ka thaiñ Narpuh, ka la wanrah ïa ka jingdheng kali kaba jur bha ha shi lynter ka surok, kiba bun ki kali kynthup ki kali rit bad ki kali heh ki la sahkut ha ka jingdheng kali ha ka thaiñ kaba ju jia khah khah, kane ka la buh jingeh haduh katta katta ïa ki nongleit nongwan kiba iaid lyngba na katei ka surok, namar ka jingdap um ha ki thliew ki syar kiba don ha surok ka buh jingma ruh ia ka jingim briew namar ym lah ban tip ki kali ki lah ban kylla ha surok ha kano kano ka por khamtam ki kali heh kiba kit jingkit.
Ki briew jong ka thaiñ Narpuh, naduh Lumshnong ter ter shaduh Malidor, ki dap da ka jingsngew bynñiaw bad sah ha ka umdum namar ka jingbym shim khia ka sorkar bad ka NHAI ban maramot ïa katei ka surok kaba la jot rathai kaba la i kum ka surok khlaw, ym lah ban len ba kaba kum kane ka jinglong jingman ka surok shisha ka buh jingeh bad buh jingma ïa ki nongleit nongwan khatam haba lap ka pang ka shitom haba ki donkam ban leit phah surmar ne leit shim dawai sha ki jaka ai jingsumar sha Khliehriat, Jowai bad Shillong, ki paidbah ki mad tang ka khyndew pum pum ha ka por ba rang ba rkhiang bad ha ka por ba hap slap ki mad tang ka ktieh ba jyrsieh, la sngewthuh ba lada ka sorkar hi kam phah shna bha bad maramot bha ïa katei ka surok, kan buh jingeh shuh shuh ïa ki paidbah nongleit nongwan ynda la poi ka aiom lyiur ba jur bha u slap.