Ba tam ka jingpynlut na kaba la mang halor ka GSWSS yn pan kaiphod u Myntri

Shillong, Risaw 09: U Myntri ka tnat Public Health Engineering (PHE) jong ka sorkar jylla u Bah Renikton Lyngdoh Tongkhar u la pan ïa ka kaiphot halor ka jingpynlut tam jong ka tnat palat ïa ka mang tyngka halor ka jingpyntreikam ïa ka projek pynpoi um sha ki bynta ka nongbah Shillong lyngba ka skhim Greater Shillong Water Supply Scheme (GSWSS).
Ïa kane ka rai la shim hadien ba ka Comptroller and Auditor General of India (CAG) ka la lap b ka don ka jingpynlut tam haduh kumba 1.71 klur tyngka.
“Ngam pat ïoh pule ïa kane ka kaiphot hynrei la jar katta na ka liang jong nga ngan pan ïa ka kaiphot balei ka don kaba kum kane” u la ong.
Ha ka kaiphot jong ka CAG la kdew, “Ha k jingpyntrei ïa ka skhim GSWSS na ka liang ka PHE ka la pynkhreh ïa ka DPR khlem da shim jingkheiñ kaba dei biang ïa ka jingjngai ki par maw bad shyiap na bynta ban pyndonkam ha ka jingpyntrei ïa kane ka skhim kaba la wanrah ïa kane ka jinglut kaba tam haduh 1.71 klur.
Ha ka kaiphot la ong ba na k liang ka CAG la la pule bniah ïa ki kot ki sla na ka ophis u EE, PHE, Electrical Division Mawphlang la lap ba na bynta ki 6 tylli ki reservoir la aiti sha ki 6 ngut ki kontraktor ha u Naitung jong u snem 2015 ha kaba la ai por ba haduh u Jylliew jong u 2016 ban pyndep.
Ha kaba ïadei bad kane ka jingpyntrei na ka liang ka NEC ruh ka l pyllait ïa ka pisa na ka bhah jong ka kumba 13.50 klur ha ki lai sien bad na ka liang k Sorkar jylla pat ka la pyllait 1.5 klur na ka bhah jong ka.
La ong ruh ba ka pisa kaba dei ban pyllait ka kot kumba 0.3 klur haduh ba la pynkhreh ïa ka kaiphot na ka CAG ha u Nailar 2020.
La kdew ruh ba ha ki kot ki sla ka CAG ka lap ba ka jinglut na bynta kane ka projek kan long kumba 14.7 klur ha kaba 2.62 klur la pyllut na bynta ban kit ban rong ïa ki maw ki shyiap na ki par ban pyndonkam ha ka jingpyntrei ïa kane ka skhim bad ka jingjngai ka jaka ba dei ban kit sha ka jaka pynhap ïa u shyiap ka long 80-82 KM, ïa ki maw pat ka jingjngai ba 33-80 KM bad ka jingjngai na kawei ka reservoir ka long kumba 3-4 KM ha Nongbah Shillong.
Ha ka DPR ka tnat kam don lupa ka jingkdew ïa ka jingai ka jaka ba dei ban kit ïa ki maw ki shyiap na bynta ban ïoh pyndonkam ha ka jingpyntrei ïa kane ka skhim.
Na ka liang ka CAG ka kdew ba kane ka jingbym kdew shai ïa ka jaka kit maw kit shyiap ka wanrah ïa kane ka jinglut kaba tam na kaei kaba dei ban pyllut wat la ha ka jingshisha ki don ki lad ki lynti ban kham pyndonkam da ki maw ki shyiap na ki par kiba kham jan hynrei na kane ka jingbym lah ka tnat ka pynlong ruh ïa ki kontraktor ban kit da na sha ki jaka ba kham jngai.
La kdew ruh ba na ka liang u EE um lah satia ban pynbiang ïa ki kot ki sla bad ki dulir kum ka challat ban pynskhem ba kine ki mar la kit na ki jaka ba la kam da ki kontraktor.