Ba sniew palat liam ka surok Weiloi – Balat, lum ka HNYF ïa ki Association kali kamai

Mawkyrwat, Naitung 21: Ka HNYF Southern Border Area da ka jingsngewkhia bad jingkitkhlieh ha kaba ïa dei bad ka jingsniew ka surok ka la lum ïa ki Association kali kamai bapher bapher kynthup ïa ka Meghalaya Commercial Truck Owners & Driver Association Central Body bad South West, Mawsynram Tourist Association, Sawsymper Tourist Association, Lawbah Tourist Association, Trai Bus kamai bad ki katto katne ki trai kali private.
Lah ban kdew ba kane ka jingïamir jingmut ka dei halor ka jingdawa ban shna pynbha bad pynheh ïa ka surok Balat haduh Weiloi kaba lah sniew palat liam bad 50 tylli ki snem naduh ka sorkar Assam kan neh kumjuh bad ka la nangrit nangrit kaba la pynsyrtok ïa ki paidbah kiba dei ïaid lyngba kane ka surok bad kaba la pynlong ïa ka HNYF Southern Border Area ban shim ki sien jam ban ïa khih da kaba tyngeh namar ym i dak ba ka sorkar kan phai khmat ne mang scheme ban ïoh ïa ka surok kaba paka.
U President jong ka HNYF Southern Border Area, u bah Kyllang Thongni haba kren ha ki lad pathai khubor u la ong ba ha kane ka jingïamir u la ïoh ban lum lang ïa baroh ki nongñiah kali bapher bapher bad ha kaba ki la ïa shim ruh ïa ka rai bad kata ka dei ba nangne shakhmat lada ka sorkar kam lah ban pynsngap ïa ki jingdawa kin sa pynlong ki jingïalang paidbah ha ki ar tylli ki jaka kata ha Ïew Balat bad kum juh ruh ha Mawsynram.
U la ong ruh ba kawei pat ka rai ka long ban pynlong ki jingïakhih kiba tyngeh nangne shakhmat ban pynsngew ha ka sorkar halor ki mat jingdawa halor ka surok bad ïa kane ka rai la shim da baroh ki association nongñiah kali hapoh la dong ka thaiñ.
Ha kawei pat ka liang, u Kyllang Thongni u la ong ba lada ka sarkar kam sngap, kum ki nongïalam kin sa shim pat sa da kiwei pat ki synjam ba tyngeh.
Kiwei de kiba la ai jingkren ki long na u President bad Secretary jong ka Meghalaya Commercial Truck Ownerss & Driver Association, u bah Mostlander bad bah Peter Marbaniang, President jong ka Sawsymper Tourist Association, u bah Baniwell Wanniang, President jong ka Mawsynram Tourist Association, u bah S. Nongsiej bad u bah Phlender Thongni, nongïalam ka MCTO&DA South West.