Ba sniew ka lynti ïaid, da ka Ambulance 4X4, aiti u MLA sha ki paidbah ka thaiñ Narbong

Nongpoh, K’Lyngkot 23: U MLA ka Jirang Constiteuncy u Bah Sosthenes Sohtun mynta ka sngi u la leit ban aiti syndon da ka kali kit nongpang (4X4) ban ai ka jingshakri sha ki paidbah jong 14 tylli ki shnong ka thaiñ Narbong bala aiti hapoh ka jingpeit jong ka Rural Development Committee, Narbong Circle.
Na ka liang u MLA u la pyntip ruh ba ïa katei ka Ambulance la mang pisa haduh 12 lakh lyngba ka skhim SRWP, ryngkat ka jingïarap jong kiwei kiwei bad kyrmen skhem ruh ba katei ka Ambulance kan lah ban ai ka jingshakri kaba paka sha ki paidbah ka thaiñ Narbong baroh kawei.
Ha katei ka sngi la sakhi ruh da ka jingdonlang ki nongïalam shnong jong ki shnong bapher bapher ha katei ka thaiñ kiba la pynpaw ruh ka jingsngewkmen kaba khraw ïa u MLA u ba la shimkhia ban peit lem ïa ka jingeh jong ki paidbah ha katei ka thaiñ khamtam haka pang ka shitom.
Na ka liang u Bah Sosthenes Sohtun haba kren ha katei ka sngi u la pynpaw ka jingsngewkmen kaba khraw namar ha u snem bala dep la lah ban plie paidbah ïa ka Health and Wellness Centre, bad ha katei ka sngi kum u MLA u la dep ruh ban kular ban ai ka Ambulance ban ai ka jingshakri sha ki paidbah, bad dei mynta ka sngi bala ioh ban aiti syndon ïa katei ka Ambulance sha ki paidbah ka thaiñ Narbong da ka ambulance kaba don Four Wheel namar ka jingsniew jong u surok ha kiba bun ki shnong ha katei ka thaiñ.