Sdang ka Sorkar ka jingïalap ban pynduhjait ïa ka jingpang TB

0

Shillong, K’ Lyngkot 24: Ka sorkar jylla ka la plie ïa ka jingïalap kaba 100 sngi ha kaba ïadei bad ka jingdonkam ban pynduhjait ïa ka jingpang TB ha kaba kane ka la sdang naduh ka 7 tarik u bnai Nohprah 2024.
La ong ba kane ka jingïalap kan kut ha ka 24 tarik u bnai Lber, 2025. Ha kine ki sngi ba pynlong ïa kane ka jingïalap kin sa don ki health camp ha ki jaka bapher bapher jong ki district. Ha kine ki camp, kin sa don ki jingkhmih ïa ka jingpang TB bad ka chest X-ray lada ka long kaba donkam.
La ïathuh ruh ba ka lad ban ïoh ïa ka jingpang TB ka la kiew ha ki riew shimet kiba la don lypa ïa kane ka jingpang ha kine ki 5 snem ba la leit ne kiba dei ruh kiba don ka jingïadei kaba jan bad kiba pang TB ne kiba dei ruh kiba la 60 snem shajrong ka rta bad kiba duna ruh ka bam kaba teimet bad kiba dei ruh kiba dih duma bad kiba pang diabetic.
Na ka liang ka Mission Director, NHM, Meghalaya ka la kyrpad ïa kino kino kiba ïoh ïa kane ka jingpang ne kiba don ki dak ki shin ka jingpang jyrhoh kaba don kyrkhah, ka jingpang shadem, ka jingduna ka jingkhia, ka snam ha ka kyrkhah, ka jingpang shitmet ne ka jingsyep ha ka por mynmied ba kidei ban phah test noh mardor. Kane ka jingleh test ka don ha baroh ki jaka sumar ne ki health center kiba don hajan.

Leave A Reply

Your email address will not be published.