Plie u Bah Sniawbhalang Dhar ïa ka Building thymmai ka Khasi-Pnar Secondary School,Bakur

Kular ban pynïoh haduh 10 lak ban shna ïa ka Auditorium

0

Jowai, K’Lyngkot 24: U Symbud Myntri Rangbah ka Sorkar Jylla u Bah Sniawbhalang Dhar ha ka sngi Thohdieng u la plie ïa u mawnongrim jong ka Building ba thymmai ka ‘Khasi-Pnar Secondary School (L.P, U.P & Sec. Section)’ Bakur (Dawki) West Jaiñtia Hills District kaba don ha khappud bad ka Ri Bangladesh.
Ïa ka jingïalang la pynïaid da u Bah Alphonsius Khonglah ha ka jingdonlang u MLA ka thaiñ Bah Lahkmen Rymbui uba dei u Chief Adviser ka Sorkar Jylla, u bah H.M Shangpliang Adviser ka tnad pule puthi ka Sorkar, u MLA barim ka thaiñ Bah Stephanson Mukhim, u Waheh Shnong ka Bakur Bah Wespar Lamin, u SDO ka Amlarem, ki bor pynïaid jong ka skul, ki nonghikai bad ki khynnah skul.
U Bah Sniawbhalang Dhar haba ai jingkren u la pynpaw kiba bun hi ki skul hapoh ka jylla ki don shibun ki jingduna naduh ki nonghikai bad ka jingduna ka jingpynrung skul ïa ki khynnah, hynrei ka Sorkar kan ïaleh katba lah ban pynkiew ïa ka pule puthi khamtam ban pynduna ïa ka jingpep skul shiteng por.
Kumba long mynta haduh ar hajar klur duna ka sorkar ka siew tang na ka bynta ka tulop ki nonghikai ha ka shi snem, kumba 900 klur tang ïa ki Private Sector (Grant-inAid), ki don haduh 14 hajar tylli ki skul hapoh ka jylla kiba ka sorkar ka hap ban peit bad kane ka pyni ïa ka jingtreishitom jong ka sorkar kum ka jylli kaba rit eh.
U la ong ha kine ki hynñiew snem ka sorkar ka la pyrshang katba lah ban pynbiang ïa ki jingdonkam jong ki skul naduh ki Building, ki nonghikai bad ki tiar ba donkam ha ki skul.
Ula ong kiba bun hi ki shim ‘tang ïa ka jingbakla kaba rit ban ïoh kynthoh ïa ka sorkar, katba ïa ki kam babha kiba ka sorkar ka la dep ban leh ym don pat kiba ai jingïaroh”, ong ma Dhar.
Kum u Myntri ba peit ïa ka tnat Pynroi Sor ula ong ka sorkar ka la wanrah ïa ki kam pynroi bapher bapher ha nongbah Shillon. Dang ha ka 21 tarik mynta u bnai ka Sorkar ka la sdang ïa ka Secretariat ba thymmai ha ka jingmang pisa kaba kot 1200 klur tyngka ha kaba u Myntri Rangbah ruh ula buh ïa ka mang tyngka na ka bynta ka Urban Development kaba kot haduh 5000 klur tam. Kine baroh ki jingpeit jngai ki long ban lait na ka jingkhapñiah ha ki bynta jong ki jaka sor.
Ula ong na ka bynta ka New Shillong ki projek mynta kiba buh ki la sdang ban treikam bad kane kan wanrah ai ka roi ka par lyngba ka jingïoh kam ïoh jam jong kiba bun ba lang.
Ula kular ruh ha kaba ïadei bad ka jingthoh Memorandum kaba la aiti ha u mynta ka sngi ula kular ban ïarap katba lah ïa kitei ki jingdonkam jong ka skul ha kine ki khyndiat sngi jong ka jingtreikam.
Ula kular ruh hadien kane ka Election MDC un ïarap pisa haduh 10 lak tyngka ban tei ïa ka Auditorium kaba lah ban pyndonkam lang na ka bynta ka skul bad ka shnong, da kaba kyntu ban pynbiang kloi ïa ka DPR khnang ba ka kam kan ïaid shaid shaid.
La pynphuh shuh shuh ïa kane ka sngi da ki jingrwai bad ki jingshad na ki khynnah skul.

Leave A Reply

Your email address will not be published.