Hato ka Sorkar kan shimkhia ïa ki nongai dawai kynbat kumba leh ïa ki Doctor bad Nurse?

0

Nongstoiñ, K’lyngkot 24: “Ka jingdon jong ki nongai dawai kynbat ha kylleng ki bynta jong ka Ri lum Khasi bad Jaiñtia, ka la ïarap shibun eh ïa kiba pang ba shitom, khamtam ïa kito longïing kiba duk ki bym kot bor ban leit shah sumar ha ki Doctor sorkar kiba la pyntbit bha lyngba ki jingpule jong ki”, ong u Bah T.Marweiñ uwei na ki riew rangbah na ka thaiñ Mawiawet West Khasi Hills.
U la ong ruh, “Ym lah len ïa ka jingshisha ba katba nang mih ki sngi ki Doctor sorkar kiba la dep pyntbit ki la nang bun. Hynrei ki jait jingpang ruh ki la nangroi kat haduh ba ki don ki jait jingpang kiba wat ki Doctor kiba la tbit katto katno kiba don hapoh ka jylla ruh kim lah satia ban sumar”.
“Bun ki nongpang ki hap ban leit shabar ka jylla kum ha Guwahati, Kolkata bad haduh Vellore, hynrei lada dei kiba duk wat tang ban leit sha ki Hospital ha Guwahati ki bym pat da jngai than ruh, kim don pisa bad ki hap ban wan phai noh sha la shnong ha ryngkat ka jingduh jingkyrmen”.
“Hynrei teng teng haba kiba haiing hasem ki wan phai sha shnong, tang ban pynhun ïa u ba pang ki la hap ban shu leit shim da ki dawai kynbat na kino kino ki nongai dawai, ha kaba don teng teng ba ki jingpang kiba ki doctor sorkar kiba la pyntbit bha kim lah shuh haba ki dih da ki dawai kynbat ki koit noh”.
“Watla kiba kum kiitei ki nongpang ki don tang teng khat hangno re hangno ruh haba ki koit na ka jing shitom kaba ki doctor sorkar kim lah satia ban pynkoit ka pyni ba ki nongai dawai kynbat ruh ki don ka bynta kaba khraw ha kaba sumar ïa ki bapang ba shitom”.
“Ha kaba ïadei bad ka jingdon jong ki nongai dawai kynbat Khasi, ngim lah ban len ba ka jingnang jong ki ban wad ïa ki kynbat kiba long ban shna dawai, ka dei ka sap kaba kyrpang kaba u Nongbuh nongthaw u la ai ha ki. Haba ngi phai sha ki nongai dawai kynbat Khasi, la ju lap ba ki don kiba shna ïa ki dawai na ki kynja snep dieng, ki sla dieng, ki jingthung kiba mih ha ki khlaw bad ki jaka riat kiba long krem”.
“Ki don ruh kiba da sumar ïa bun jait ki kynbat ki jingthung kiba long dawai nangta ki sa shna la ka long da kaba ki tylliat lang bun jait ki kynbat kiba la pynrkhiang bad pynkylla powder ba kin long kum ka dawai. Don ruh kiba shu shet ha u khiew haduh ba ka um kaba mih na ki kynbat ba la shet ka la kylla ring bad ki ithuh biang biang, ba ka la long dawai bad haba ki ba pang ba shitom ki wan shim ïa kitei ki jait dawai, ki ju bthah thik pa thik ïa ka rukom dih kumba bthah ki doktor sorkar.
“Haba phai pat ha kiba bun ki nongai dawai kynbat Khasi haduh mynta mynne ki don bun bah ki nongai dawai kynbat kiba da tbit shisha. Don bun ruh kiba don ïa ka sap kaba kyrpang, hynrei haduh mynta kim pat ïoh jingïarap na ka sorkar na ka bynta ban leit pyntbit lan ban buh da ki jaka sumar kiba paka ryngkat ki tiar ki tar ne ki kor na ka bynta ban shna ïa ki dawai na ki kynbat ba ki kheit na khlaw na btap”.
“Ym tang katta lada ka sorkar ka la ithuh ïa ki nongai dawai kynbat Khasi kum ki nongsumar ïa kiba pang ba shitom, kiba don ïa ka bynta kaba khraw ha kaba wan rah ïa ka jingkoit jingkhiah ïa ki paitbah nongshong shnong ha ka jylla, ka la dei ban phai khmat sha ki lyngba ki lad jingïarap kiba kham kyrpang namar lada ïa ki ba leit pule doctor ka don ka bhah kaba kyrpang na ka bynta kiba la pass ïa ki jingpule ba kin leit pyntbit kum ki doctor. Lehse ki nongai dawai kynbat kiba don ïa ka sap kaba kyrpang ban sumar ïa kiba shitom kan long ka jingkyrkhu lada ki ïa ka lad ban leit pyntbit ha ka sap kaba ki don” ong u Bah Marweiñ.

Leave A Reply

Your email address will not be published.