Phah tuklar ka HYC ïa ka Sorkar ba slem pyllait ïa ka baibam ki khynnah skul

Shillong, K’ Lyngkot 24: Ka education cell jong ka seng Hynñiewtrep Youths’ Council (HYC) ha ka sngi Thohdieng ka la dawa ïa ka sorkar ban tuklar ha kaba ïadei bad ka jingslem palat ban pyllait ïa ka baibam ki khynnah kaba dei ban ai manla ka snem ha ka jylla, khamtam ha kaba ïadei bad ka pre- matric bad post- matric scholarship kaba hab hapoh ka “Umbrella Scheme” kaba la buh kyrpang na ka bynta ki khynnah pule riewlum ne Scheduled Tribe (ST) kiba dei hapoh kane ka skhim.
Ha ka shithi ba la phah sha u Commissioner & Secretary ka tnat pule puthi u Vijay Mantri, ka HYC ka la ong ba kine ki jingpynslem ki la ktah bha ïa ka pule puthi jong kiba bun ki samla pule ha ka jylla. Ka jingpyllait kloi ïa ka baibam ha ka por kaba biang ka long kaba kongsan bha na ka bynta ki samla pule ba kin bteng ïa ki jingpule jong ki khlem kino kino ki jingeh ne jingshah pynthut.
“Ha ka jingtohkit jong ngi kaba dangshen lyngba ka Right to Information (RTI) Act na ka Ministry of Education ka la pynpaw ba ka jingslem ban ai ïa ka baibam ki khynnah ka dei namar ka jingslem ban aiti ïa ka Utilization Certificate sha ka Ministry of Education. Ka Ministry ka la dep ruh ban buh ïa ka por kaba shai na ka bynta ban aiti ïa kine ki certificate, kaba dei ruh ha u bnai Nailur jong manla u snem. Ka long kaba kongsan ïa ka jylla ba ka dei ban bud ïa kine ki jingbthah na ka bynta ban ïoh pyllait ïa ka baibam ki khynnah ha ka por kaba dei. Ngi kyntu ïa ka tnat jong phi ban buh shwa hakhmat ban aiti ïa kine ki syrnot ne certificate khnang ban lah ban kiar na kino kino ki jingshah pynslem ha kaba ïadei bad kane ka kam,” ong ka HYC.
“Ban bynrap ha kaba ïadei bad kane ka jingpynslem ngi ai ka jingmut ba dei ban thaw noh da ka scholarship cell hapoh ka tnat pule puthi. Kane ka cell kan shim ka jingkitkhlieh ban khmih ïa baroh ki rukom treikam ha kaba laitluid ha kaba ïadei bad ka jingpyllait ïa ka scholarship,” ong ka HYC da kaba bynrap ruh ba da kaba buh ïa kane ka cell kaba kyrpang ka ban peit beit tang ïa ki scholarship, ka tnat kan lah ban pynduna ïa ka jingma na ka jingslem ban pyllait ïa ka baibam bad kane ka cell kan lah ruh ban pynbha ïa ka jingïadei kam kaba ïadei bad ka jingpyllait ïa ki baibam ki samla pule.