Ba lah ban mih ka huri hura namar ka jingkajia bad ka Hima Jirang pynjari kyndon u District Magistrate

Nongpoh, Nailar 28: Hadien ka jingtip kiba thikna, halor ka jingthmu jong u Syiem ka Hima Shiong lem bad ka kynhun ban pynieng da ka signboard haka shnong Umshalani, bad kiwei kiwei ki shnong khappud ka Ri-Bhoi District kaba don haki thaiñ khappud bad ka jylla Assam kaba hap ha Jirang Constituency, haka 29 tarik Nailar, 2026 kaba dei ruh ka jaka kaba ïakajia pud hapdeng ka Hima Jirang bad ka Hima Sohiong, naka liang u District Magistrate ka Ri-Bhoi u la pynjari da ka kyndon aiñ 163 Bharatiya Nagarik Suraksha Sanhita, 2023 ban khanglad na kano kano ka huri hura kaba lah ban mih ha katei ka shnong bad ruh kaba lah ban ktah ïaka shongsuk shongsaiñ ki paidbah.
Lah ruh ban kdew hangne ba ka jylla Assam dang shen kala ujor ruh halor ka jingshna surok ha katei ka thaiñ kaba lah ban wanrah shuh shuh ïaka jingthud ha kaba ïadei bad ka shongsuk shongsaiñ ki paidbah.
Kumta naka liang u District Magistrate ka Ri-Bhoi u Dr. Abhishek Saini u la mana ban lum briew palat ïaka 5 ngut ha ka thaiñ Umshalani, la khang ruh ïaki nongïalam ka Hima Sohiong, Hima Mawtamur ba kin rung sha katei ka jaka, bad kino kino ki nongkyrshan bad kino kino ki briew kiba trei na ka bynta ka Hima Sohiong kim dei ban pynieng, buh ne pynkylla ïa kano kano ka dak, jingtei ne signboard ha ka shnong Umshalini bad ym dei mano mano ban shim ïa kano kano ka kam kaba lah ban pynmih ïa ka jingïaleh pyrshah, jingkajia ne pynthut ïa ka shongsuk shongsaiñ ki paidbah ka thaiñ.
Kino kino kiba leh pyrshah kin ngat haka kyndon aiñ jong ka Bharatiya Nyaya Sanhita, 2023 bad naka liang ki pulit ka Ri-Bhoi, Sub-Divisional Officer (Civil), Patharkhmah Civil Sub-Division, Ri-Bhoi District kin pyntreikam ïa kane ka hukum ban pynneh ïaka suk ka saiñ, bad kane ka hukum kan treikam mardor tad haduh ban da pynbna da kumwei.