Ba ïoh pdiang ïa ka ‘National Florence Nightingale Award 2021’ ai burom ka KSU ïa ka Kong Victorealness

Mawkyrwat, ‘Naiwieng, 11: Ka Khasi Students Union’s (KSU) jong ka Rangthong Unit hadien ka jingwan phai jong ka kong Victorealness Syiemlieh na ka jingleit pdiang ïa ka khusnam ha Nongbah Delhi ka la pdiang bad pynkup burom ha ryngkat u syntiew bad ka jaiñ kum ka dak jong ka jingaimynsiem na ka bynta ka jingpoi jong ka sha kata ka thong.
Lah ban kdew ba ka kong Victorealness Syiemlieh ka dei na ka Shnong Rangthong, South West Khasi Hills bad kaba la shongthait na ka kam kum ka Assistant Director jong ki Nurse hapoh ka Directorate of Health Service (DHS) Shillong bad ka khusnam ba ka ka la ïoh pdiang ïa ka “National Florence Nightingale Award 2021” na ka President jong ka Ri India, ka Droupadi Murmu ha ka 7 tarik u ‘Naiwieng ha Rashthra Bhawan, New Delhi na ka bynta ki kam rat bah jong ka kaba la noh synñiang ïa shibun ki paidbah ha ka pang ka shitom bad ha ka imlang sahlang na ka bynta ka koit ka khiah.
U bah Ïohnoh K. Nongrem, General Secratary ka KSU Rangthong Unit haba jingkren ha kane ka sngi ban pdiang burom ïa ka kong Victorealness Syiemlieh u la pynpaw ka jingsngewsarong ba ki don ki ‘riewkhraw napoh jong ka shnong Rangthong kiba la wanrah ïa ka nam bad ka burom ba la noh synñiang ruh shibun ïa ki kam ba bha ha ka imlang sahlang hapoh ka Shnong bad ka Ri Khasi hi baroh kawei bad na ka bynta ka jinglen lade ban ai ka jingshakri kaba bha tam ïa ki paidbah ha ka ban sumar ïa ki ba pang ba shitom ha ki jaka sumar pang ne ha ki Hospital bad kiwei de ki kam ba ka trei haduh ba kan da dei ka por ban shongthait na ka kam (Retired) bad kaba la ïoh ruh ban shah pynkup burom ha ka President jong ka Ri India, ka Droupadi Murmu.
Namarkata, kane ka jingïoh burom jong ka ka ai mynsiem shuh shuh ïa ka KSU bad ïa ka jaidbynriew hi baroh kawei ba kin nangtrei shibun ki kam kiba long ka jingmyntoi ïa kiba bun ki paidbah nongshong shnong.
Na ka liang ka kong Victorealness Syiemlieh kala pynpaw ka jingsngewnguh ïa ka KSU Rangthong Unit ba ka la kynmaw kyrpang ban pdiang burom ïa ka halor ka jingïoh jong ka ïa ka National Florence Nightingale Award 2021. Kumta ka kitbok kitrwiang ïa baroh kiba dhkot jong ka seng ha baroh ki unit bad ki shnad treikam jong ka KSU hapoh ka jylla baroh kawei ba ka nang ïai im bad trei na ka bynta ka jingbha ha baroh ki bynta ha ki kam shakri ïa ka dong ka thaiñ bad hapoh ka jylla Meghalaya hi baroh kawei.
Ïa kane ka jingpdiang burom la pynlong hapoh shnong hadien ba ka kong Victorealness Syiemlieh ka poi ha la shnong ha Rangthong na ka jingleit shim ïa ka khunsnam na Nongbah Delhi.
Ha kane ka sngi la ïa donlang naduh u bah Ïasoh L. Nongrem, General Secretary bad u bah Saiñdur Syiemlieh, President ka KSU Rangthong Unit lem bad kiwei de ki dkhot jong ka seng ha ryngkat ki paidbah jong ka shnong Rangthong.