Buh mawnogrim u Bah Metbah ban tei ïa ka ophis BDO ha Mairang
Baroh 46 tylli ki Block kin sa ïoh ïa la ki ophis treikam: Hamlet Dohling
Mairang, Naiwieng 11: U Lamphang ka Ïing Dorbar Thaw Aiñ ka jylla Meghalaya, u Bah Metbah Lyngdoh, hynne ka sngi u la ïoh ban plie ïa u mawnongrim jong ka jingtei ïa ka ophis treikam kaba thymmai jong ka ophis u Block Development Officer ka Mairang Block.
Ha kane ka sngi la don lang ryngkat u myntri ba dei peit ïa ka tnad Community and Rural Development, u Bah Hamletson Dohling, u myntri ba dei peit ïa ka tnat Water Resources, u Bah Brolding Nongsiej, u Deputy Commissioner ka Eastern West Khasi Hills District, u Bah W. Nongsiej, I BDO ka Mairang Block, I Dr. L.R Hynñiewta, ki nongtrei jong ki tnat sorkar bapher bapher bad kiwei de.
Ha ka jingkren kum u kongsan, u Lamphang ka Ïing dorbar Thaw Aiñ ka jylla, u Bah Metbah Lyngdohu la ong ba ka Mairang Block ka long kawei na ki Block kiba la rim tam ha ka jylla bad u la ong ruh ba ka ophis u BDO, ka long kawei na ki ophis ba kham donkam jong ka sorkar, namar ka long ka nongpynïasoh ïa ki paidbah nongshong shnong bad ka synshar khadar lyngba ki tnad bapher bapher jong ka sorkar, namar lyngba jong ka la pyntreikam ïa kiba bun ki skhim bad prokram jong ka sorkar jylla bad sorkar kmie.
U Lamphang u la pynpaw ruh ïa ka jingsngewnguh ïa u myntri ka tnat Community and Rural Department, u bah Hamletson Dohling halor ka jingshimkhia jong u ha kaba ïadei bad kane ka projek ïa kaba la mang pisa 2 klur 88 lak tyngka bad ïa kaba yn sa sdang pyntrei noh shen.
U Myntri ka tnat Community and Rural Department, u Bah Hamletson Dohling, ha ka jingkren ka jong u, u la kren halor ka jingïaid lynti jong ka tnat lyngba ki snem, khamtam eh ha kaba ïadei bad ka jingpyntreikam ïa ka skhim MNREGS bad ka jingroi sted jong ka jingdon ki Seng Treilang ne Self Help Group ha ki khyndiat snem kiba la leit noh.
U la pyntip ruh ba baroh 46 tylli ki Block jong ka jylla kin sa ïoh ïa la ki ophis treikam kiba thymmai bad la mang pisa mar 2 klur 50 lak na ka bynta ban tei ïa ki ophis ba thymmai jong 6 tylli ki block. La mang kyllum lang kumba 120 klur na ka bynta ban tei ïa ki ophis treikam jong ki 40 tylli kiwei pat ki block.
Kiwei kiwei pat kiba la kren ha kane ka prokram ki kynthup ïa u Myntri Sorkar u Bah H. Brolding Nongsiej, u Deputy Commissioner ka Eastern West Khasi Hills District, u Bah W. Nongsiej, u Additional Deputy Commissioner ka Eastern West Khasi Hills District, u Bah C.P Mawkon bad i BDO ka Mairang C&RD Block, i Dr. L. R Hynñiewta.