Nongstoiñ, Naiwieng 11: Ka Lyngngam Presbyterian College Mawthengkut, ha ka sngi balang jong ka taiew ka la ïoh ban plie paidbah ïa ka building kaba thymmai jong ka College, ha kaba u Dr. W.R Kharlukhi u MP ka Rajya Sabha u hiar dalade ban plie ïa ka kum u kongsan.
Lah ban pynkynmaw ba ïa kane ka building kaba thymmai jong ka College, la ïoh ban tei lyngba ka skhim NEC jong u snem 2020-21, kaba la wanrah kyrpang da u MLA ka thaiñ u bah Gigur Myrthong ha ka mang pisa kaba la kot shaduh ka 95,26,704 tyngka. Kumta ka jingïoh jong ka Lyngngam Presbyterian College ïa kane ka ïing kaba thymmai, ka la long ka jingkyrkhu kaba khraw ïa ka College. Kumba long baroh shi katta jong ka jingïaid lynti, kam pat don ïa la ka jong ka ïing building, hynrei la shu pyndonkam ha ka ïing jong ka Ri Lyngngam Mission Centre Synod building ban pynlong klas, kata naduh ba la sdang ban seng ïa ka ha u snem 2016.
U kongsan Dr Kharlukhi haba ai jingkren ha kane ka jingïalang, u la ai ka jingïaroh ïa u MLA u ba la pyrshang ban thaw ki lad ki lynti ban pynïoh ïa ka song pisa na ka NEC ban kyntiew ïa ka dong ka thaiñ bad khamtam ïa ka pule puthi. U la ong ba ban wanrah shi klur tyngka kam dei kaba suk, hynrei hap ban wad ki lad ki lynti bad u la ong ruh ba u MLA u dei u ba ïohi jngai na ka bynta ka jingdonkam ka dong ka thaiñ.
Na ka liang jong u, u la ai mynsiem bad kyntu ruh ïa ka College ba ka dei ban buh thung ban pyrshang ban pynïoh ïa ka jingithuh sa na ka NACC. Namar shisien ba la ïoh jingithuh bad mynjur da ka NAAC lada ïoh ha kano kano ka kyrdan ruh ka pisa kan wan beit na Nongbah Delhi.
“Wat ong ba phim lah namar ka NACC kam peit tang ïa ka college kaba pynmih ki khynnah kiba stad, namar ka lum jingkheiñ jong ka NAAC ka long ban peit ïa ka shnong ka long kumno ka college ka treikam kumno bad kaei ka jingïoh jingkot jong ki khynnah pule”, ong u Dr Kharlukhi.
Na ka liang jong u MLA ka Mawshynrut u bah Gigur Myrthong haba ai jingkren, u la ong, “nga la pyrshang ban wad ïa ki song kiba kham heh na ka bynta ban pynïoh jingïarap ïa ki skul bad ki jaka pule. Ha ka jingïai buddien nga la lap ba ka don ka pisa na ka NEC kaba la buh bhah 30% bad lyngba ka jingïarap u Myntri Rangbah, ngi la ïoh ïa kane ka skhim haduh 3 klur ha ka sien kaba nyngkong”.
U la ong ruh ba u la ïoh biang sa 5 klur ka skhim na ka NEC na ka bynta u snem 2022-23 bad lyngba ka jingïakhun jong u, katei ka skhim kan sa neh baroh shirta bad lada long MLA sa mano mano ruh kane ka skhim kan wan beit hynrei ka shong pat sa tang ha ka jingbuddien.
