Shillong, Rymphang 22: Ka mat jingïatai halor ka Lokayukta kaba la wanrahd a u bah Adelbert Nongrum, MLA ka VPP na North Shillong ka la shah kyntait ha ka sien kaba ar hapoh ïingdorbar ka jylla ha ka sngi Palei.
Kane la long hadien ba ka Resolution ba la wanrah da u Bah Adelbert ka la shah kyntait ban pynlong ka jingïatai lyngba ka voice vote.
Lah ban kdew hangne ba u MLA ka North Shillong ha ka 20 tarik mynta u bnai, u la wanrah da ka Private Member’s Amendment Bill na ka bynta ban pynkhlaiñ ïa ka jingtreikam ka Lokayukta Act, kaba u ong la pyntlot noh da ka amendment kaba la wanrah ha u snem 2021. Hynrei kane ka Amendment Bill ka la shah kyntait khlem da ïoh ban ïatai lyngba ka voice vote, wat haba u Bah Adelbert u ladep ban batai ïa ka jingthmu kane ka Amendment Bill jong u.
Hadien ka jingshah kyntait ka Amendment Bill, u MLA ka North Shillong u la wanrah da ka Resolution ban pynpaw hi ïa kajuh ka jingthmu kumba u la pynpaw ha ka por ba u wanrah ïa ka Bill.
U Myntri Rangbah, u Conrad Sangma, haba pynshai ïa kane ka Resolution, u la ïathuh ba kaei kaba ka sorkar ka la wanrah ha ka snem 2021 lyngba ka amendment ka long ban ailad ïa ka Lokayukta ban treikam, ha ha kaba la ailad ia u Chairman bad kiwei pat ki dkhot ban treikam, wat lada ki dkhot baroh kim don ruh, ym kum ka aiñ jong u snem 2014, kaba bthah badei ban don lut ki dkhot baroh.
