Shillong, Rymphang 22: U MLA jong ka TMC na Nongthymmai, u Bah Charles Pyngrope ha ka sngi Palei, u la rah da ka Zero Hour Notice ha kaba ïadei bad ka jingshah kren beiñ bad shah pynhiar na Bus kawei ka Sister ha ka por ba la mih na Dudhnoi ban leit sha Goalpara, Assam.
Kane ka jingrah u Bah Charles ha Iingdorbar ka long katkum ka jingmih khubor ha kawei na ki kot khubor Khasi.
Katkum kum ka jingpyntip jong u Auxilliary Bishop ka Tura Diocese, ka Sr. Rosemary, kaba trei ha St. John’P parish, Siju, West Garo Hills ka la mih na Dudnai sha Goalpara ha ka 17 tarik mynta u bnai bad ka la kiew da ka Bos ha ka por 11.00 baje mynstep na Dudnai bad siew ruh ia ka bai bos haduh Goalpara.
Hynrei tang hadien katto katne por u nongbud jong ka Bos bad ki katto katne kiba shong hapoh ka Bos ki la sdang ban kren da ki ktien ba khlemakor ia ka bad ia ka jaiñ riewniam ba ka phong bad ia ka jingngeit niam jong ki. Hadien katto katne, ki pynsangeh ia ka Bos ha kawei ka jaka ba kham kynjah bad phah hiar da ka bor na ka Bos. Kane ka jingjia ka la ktah ia ka jingmut jingpyrkhat bad shah leh bym hok jong ka Sr. Rosemary kum ka kynthei bad kum ka riewniam. Da ka jingiarap jong ki katto katne ki briew, ka Sr. Rose ka la kiew noh da kawei ka Bos ban leit sha Goalpara.
U Auxilliary Bishop u la kyntu ia ka Sorkar Jylla ba kan shimkhia mardor halor kane ka jingjia da kaba iakren bad ka Sorkar Assam khnang ba kum kine ki jingjia kin ym jia shuh hadien habud.
“Ban shu pyndik ia ki briew tang namarba ki phong ia ka riam kaba kyrpang lane ba ki phong ia ki jaiñ niam ka long kaba sngewkhia bha, ka bym pat ju iohsngew bad kaba ym lah satia ban pdiang. Kine ki jingjia, ki jia tang namarba ka don ka jingialam bakla bad ka jingpeit shiliang khmat kaba pynsaphriang pyrshah ia kano kano ka jait niam,” la ong u Bah Pyngrope bad kyrpad ia ka Sorkar ba ka dei ban shimkhia mardor ia kane ka jingjia da kaba ong, “nga sngew ba kane ka sorkar ka dei ban shim ia ki lad ki lynti ban pyrkhing bha kum ia kine ki jingpeit shiliangkhmat.”
Ha kajuh ka por u Bah Ronnie V. Lyngdoh, MLA ka Congress na Mylliem, uba long ruh u nongïalam ka Liang Pyrshah u la ai da ka jingujor lyngba ka jingthoh sha u Myntri Rangbah lyngba ka ïingdorbar.
Haba ai jubab halor kane ka jingjia, u Myntri Rangbah ka Jylla u Conrad K. Sangma u la iathuh ba u la ioh jingtip bad mar mar u la pynsngew ia kane ka jingjia ha u Myntri Rangbah ka Jylla Assam u Himanta Biswa Sarma.
U la iathuh ruh ba ka jingioh lum jingtip kam pat biang satia satia ban buddien ia kane kam.
“Ngi dang ap ia ka jingpyntip kaba thikna namarba ia mynta ka jingtip kaba ngi ioh ka long ia ka tarik, ka por bad ka jaka ba ka (Sr. Rose Mary) leit jingleit, hynrei ngim pat ioh lum jingtip u nombar kali jong ka Bos lane kano kano ka sakhi kaba pynlah ia ngi ban lapdien ia kiba donkti,” u la ong.
U la kular ruh ba un sa shimkhia bha khnang ba kum kine ki jingjia, kin ym jia shuh hadien habud ha kano kano ka bynta jong ka ri.
U Sangma u la ong ba un sa ai jubab tang shu ioh ka jingtip kaba bniah halor kane ka jingjia.
U Myntri ka Sorkar Jylla u Rakkam A. Sangma uba mihkhmat na Rongara-Siju u la pynrem jur ïa kane ka jingjia bad kyntu ïa u Myntri Rangbah ka Jylla u Conrad K Sangma ban tuklar lem halor ka jingshah kren beiñ ka Sister Rose bad shah pynhiar shiteng lynti na ka bos ha ki katto katne ki nongleit jingleit ha Assam.
Ha ka shithi ba la phah sha u Myntri Rangbah, u Rakkam u la ong, “da kaba shim ïa ka jingkhia jong ka jingjia, nga kyntu ïa phi ban pynshitom ïa kiba donkti, ïa u nongniah kali bad ïa baroh ki briew kiba donkti bad nga kyrpad ruh ïa phi ba phin ïakren ïa kane ka kam bad ka Sorkar Assam na ka bynta ka bha ka miat jong ki paidbah baroh.
