Ban pynbna ïa ka NEIGRIHMS kum ka INI, yn buddien u CM na ka Sorkar Pdeng

Shillong, Rymphang, 22: U Myntri Rangbah ka Jylla u Conrad K. Sangma ha ka sngi Palei u la kular ban buddien na ka Sorkar Pdeng ban pynbna ïa ka North Eastern Indira Gandhi Regional Institute of Health and Medical Sciences (NEIGRIHMS) kum ka Institute of National Importance (INI).
U Sangma u la ong ba naduh ka por ba u JP Nadda u dang long u Myntri ka Koit ka Khiah u ladep ban pynsngew ïa kane ka mat.
“Ngi kyrmen ba kane ka sienjam ka long kaba ïaid shakhmat namarba ladep rah ruh ban ïatai hapoh ka Parliament bad ngi dang ïai buddien ruh na ka liang jong ngi,” u la bynrap. U Myntri Rangbah u la ong ba kam pat long kaba dei na ka liang jong u ban ai ïa kano kano ka jubab namarba kane ka kam ka dang don ha ka kti jong ka Sorkar Pdeng.
Shwa kane, u Nongïalam ka Liang Pyrshah Bah Ronnie V. Lyngdoh u la kyntu ïa u Myntri Rangbah ban buddien na ka Sorkar Pdeng halor ka jingai kyrdan INI ïa ka NEIGRIHMS khnang ban weng ïa ka jingduna doktor bad ka jingmih noh jong ki doktor ha kiwei kiwei ki jylla.
U la ong ba ïa u Neurosurgeon la pynkynriah na NEIGRIHMS Hospital sha kawei ka Private Hospital kaba don ha Guwahati.
Ha ka jingïakren bad ki lad pathai khubor hadien ba la wai ka Dorbar, u Bah Lyngdoh u la ong ba u sngewhun ïa ka jingkular jong u Myntri Rangbah ban buddien ïa kane ka kam na ka Sorkar Pdeng.
Haba kylli, u Bah Lyngdoh u la ong, “kam dei tang ban shu ïoh ïa ka jingithuh kum ka Institute of National Importance. Kaba kongsan eh ka long lada ka la ïoh jingithuh kum ka Institute National Importance baroh ki doktor, ki paramedical, ki staff nurse kiba trei ha NEIGRIHMS Hospital kin ïoh ïa ki jingmyntoi kumba ka long ka AIIMS.”
“Naduh ba la pynkha (ïa ka NEIGRIHMS) la ïathuh ïa nga ba kam don ka jingbishar halor ka jingthung nongtrei hapoh kane ka shlem ai jingsumar. Ka jingbishar halor ka jingthung briew kan pynïohnong hi ïa ki briew kiba trei ha NEIGRIHMS. Hynrei kane kam shym la don satia mynta la bun bun snem kaba mut ba ka jingsiew ba ïaryngkat kam don satia,” u la ong bad bynrap kane ka dei ka daw kaba pynlong ïa ki doktor ban mih noh na NEIGRIHMS.
Ha 18 tarik Risaw, 2023 u Bah A.L Hek u la phah da ka jingthoh sha u Myntri ka Sorkar Pdeng ba khmih ïa ka tnad ka Koit ka Khiah u Dr Mansukh Mandaviya katkum ka shithi No ALH/M/PER/1/2023/123 ban kyntiew kyrdan noh ïa ka North Eastern Indira Gandhi Regional Institute of Health and Medical Sciences (NEIGRIHMS) kum ka AIIMS ha kaba u Dr. Mansukh u la pyntip sha u Bah Hek ba kam don satia ka jingtyrwa ban kyntiew kyrdan ïa ka NEIGRIHMS kum ka AIIMS hynrei ka jingpynkhreh ban kyntiew kyrdan ïa ka kum ka Institute of National Importance (INI) ka dang ïaid shakhmat.
Kane ka shithi kaba la phah da u Dr Mansukh sha u Bah Hek ka long naduh ka 29 tarik, Naiwieng 2023 katkum ka shithi No D.O.No.Z-11011/14/2023-NE ha kaba u la ong, “la pyntip sha phi ba ïa mynta kam don kano kano ka jingtyrwa ban kyntiew kyrdan ïa ka NEIGRIHMS sha ka AIIMS hynrei ka don tang ka jingtyrwa ban kyntiew kyrdan ïa ka NEIGRIHMS kum ka INI bad halor kane ka jingbishar bniah bad jingpynkhreh ka dang ïaid shakhmat mynta.”
U Bah A.L Hek u la phah kopi ruh ïa kane ka shithi sha u Director ka NEIGRIHMS ba un tip bad buddien ïa kane ka kam.