Ap ka jingma ïa ki khynnah : Ba la tor ka jingkieng ïaid kjat ha Syllang

Nongstoiñ, Naiwieng 3: Ki paid nongshong jong ka shnong Mawphansien, kawei na ki shnong kaba don ha ka thaiñ Rambrai ki la ud la nam, namar ka jingshem jingeh palat haba ïadei bad ka jingbym don jong ka surok kaba lah ban ïaid kali. Ym tang katta, hynrei ban poi sha katei ka shnong ka long kaba jynjar bha haduh katta katta khamtam ha ki por lyiur, namar ka jingdap jong ka umsaw ha ka wah Syllang, kawei na ki wah kaba don tang kawei ka jingkieng ïaid kjat kaba rit, kata ruh ka dei kaba la jot rathai bad kaba la noh syrtap sha tbian.
Ka long ruh kaba syier kaba ima ban ïaid khamtam ïa ki khunlung khynnah kiba ïaid lyngba katei ka jingkieng kaba la jot, namar ki don kumba 30 ngut ei ei ki khynnah skul, kiba leit pule sha Steplanglur kaba jngai kumba shi kynta ei ei da ka kjat na katei ka shnong ban poi shaduh katei ka skul, kaba don ha ka lynti bah jong ka surok Nongstoiñ sha Rambrai.
Katei ka wah wat ha ki aïom tlang ruh ka long kaba jylliew ha kaba ki paidbah nongshong shnong jong katei ka shnong, ki hap ban ïaid beit lyngba tang itei I jingkieng ïaid kjat, I ba la I kumban sha shu dkut noh ha kano kano ma ka por bad ka ap jingma shisha khamtam ïa ki bym nang ban jngi.
Haba ïadei bad katei ka phang, na ka liang jong ka seng Hynñiewtrep National Youth Movement HNYM lyngba ka tnad Mawphansien hapoh ka jingïalam jong u bah Khostingwell Nongsiej kum u President, mynta ka sngi ka la leit ban ai jingthoh ha u bah T.Diengngan BDO ka Nongstoiñ C&RD Block Nongstoiñ, ban kyrpad pynïoh jingkieng kyrkieh na ka bynta katei ka shnong, khnang ban lait na ki jingeh ha ki aïom lyiur ka ban.
U bah Khostingwell Nongsiej haba ïakren bad u nongthoh khubor, u la ong, “Ngi sngewthuh ïa ka jingeh jong ka sorkar ba kan ym lah ban leh kyrkieh ïa kane ka kam, namar kata ngi pan tang ka jingkieng kaba lah ban ïaid tang ki kali rit ruh lah biang, wat la ngim don ka surok. Hynrei lada ka sorkar kam lah wat ïa kata ruh ngi pan tang ka ban lah ban pyndonkam ïaid kjat, namar lada katei ka jingkieng kan dkut ha ka por bympoi pyrkhat, yn ym don lad shuh da kiwei pat ba ki nongshong shnong jong katei ka thaiñ kin ïaid ban jam sha shilliang ka wah”.
U bah T.Diengngan BDO haba ïakren bad u nongthoh khubor, u la ong shen un leit ban jurip hi dalade ïa katei ka jingkieng. Hadien kata katba lah ei un ïarap ban pynïoh ïa ka jingkieng kaba kham skhem, khnang ban kham suk ki paidbah jong katei ka thaiñ.
Lah ban kdew hangne ba ha katei ka shnong, ki don kumba 50 tylli ei ei ki longïing longsem bad kumba 400 tam ei ei ha ka jingbun briew. Ka dei ruh kawei na ki shnong kaba dang hap hapoh ki ar hima ïa kaba la tip kum ka Rambrai-Myrïaw Syiemship.
Ki nongshong haba ïakren bad u nongthoh khubor, ki la ong katei ka shnong kat haduh mynta mynne ka la kynjoh sha ki 60 snem tam ei ei, kata naduh ba la seng ïa ka bad kata ka long naduh u snem 1960 ei ei. Hynrei kaba sngew myllung ban ïohsngew ka long ba kitei ki nongshong shnong jong katei ka shnong, kat haduh kine ki sngi ki dang ïaid da ka kjat ban leit siew leit pet sha sor Nongstoiñ namar ka jingbym biang jong ka surok.
Ki katto katne ngut ki longkmie ki la batai ruh ïa ka jinglong jingman ha ki aïom lyiur da kaba ki la ong, “Ha ka por ba dap ka umsaw ïa ka wah Syllang kaba ngi hap ban ïaid lyngba ban jam na shilliang sha shilliang, bunsien ngi hap ban pynpep skul noh ïa la ki khun. Lane lada ki ïoh ïa ka lad ban leit skul ruh, ngi kum ki kmie ki kpa ngi ju leit ban ai ja ïa ki khun ba kin ïoh ban bam shatei sha shilliang. Ngi hap ban shu ai da kaba shu kawang ïa ki ja song na shilliang sha shilliang, khnang ba kin ïoh ban bam hadien ba ki la wan phai na skul ba ki la ap da ki kynta ban rngad ka um”.