Ka skim FOCUS kam dei satia ka sut, la ai duh sha ki nongrep ban seng kam: Conrad

Jowai, Naiwieng 03: U Myntri Rangbah duh jong ka sorkar jylla u Conrad K. Sangma mynta ka sngi Thohdieng ula wan plie bad buh mawnongrim ïa lai tylli ki ki skim pynroi hapoh jong ka shnong Raliang kaba hap hapoh ka Laskeiñ C&RD Block West Jaiñtia Hills District.
Kine ki lai tylli ki skim ki kynthup ban shna thymmai ïa ka Raliang Fire Service Station, kaba ar ka dei ka jingplie paidbah ïa ka Raliang Greater Water Supply Scheme ka ban sam umbam haduh 30 tylli ki shnong bad kaba lai ka Raliang Way Side Amenities ne ka jaka bam na ka bynta ki nongwan shangkai.
Ha kane ka sngi la wan ban ïadonlang naduh u myntri sorkar jong ka tnad kam pynroi sor ka jylla u ma Sniawbhalang Dhar, u MLA ka thaiñ ma Comingone Ymbon, u Dolloi ka Elaka Raliang ma C. Lyngdoh, u Prafulla Kumar Boro, MCS: Additional Deputy Commissioner, u Superintendent of Police u Bikram D. Marak, MPS, ki ophisar na ki tnad sorkar bapher bapher bad ki paidbah nongshong shnong nalor ki nongrep jong katei ka thaiñ kiba la mih paidbah ban pyndap ïa katei ka jaka ba pynlong jingïalang.
Ha kane ka sngi u Myntri Rangbah ula sam ruh ïa ki cheque sha ki nongrep lyngba ka skim FOCUS, ka YESS, ka NRLM CIF bad kumjuh la sam ïa ki khun Sniang sha ki nongrep jong ka thaiñ.
Haba ai jingkren ha kane ka sngi na ka liang u Conrad ula ai ki kyntein ai khublei da ka ktein pnar ïa baroh ki paidbah kiba la poi sha kane ka jingïalang, ha kajuh ka por ula pynsngew ruh ha kine ki 4 snem shiteng ba la dep ka sorkar kala ïa kynduh shibun ki jingeh na ka jingwan lyngshop jong ka khlam Covid-19, hynrei ka sorkar kam shem la sangeh bad kala pyrshang katba lah ban pynkiew ïa ka jylla ha baroh ki liang.
‘Ka sorkar kala trei shitom ban pynlong ïa ka jylla kum kawei na ki jylla hapoh ka Ri kaba ki khot ka ‘Best State’ bad kumba long mynta kila don shibun ki skim kiba la pyntreikam na ka bynta ka jylla da ka jingthrang ban pynlong ïa kane jingangnud ban kynthup ïa ka jylla hapoh Top-10 State hapoh ka Ri’.
Ula ong ban pynurlong ïa kane ka dei lyngba ka jingtrei shitom jong ki nongrep khamtam ki longkmie bad ki khun samla ka jylla ba kan long shishi ka jylla kaba kiew bha ha baroh ki liang khamtam ha ka roi ka par bad haka juh ka por kan long ruh ka nuksa na ka bynta kiwei de ki jylla hapoh ka Ri.
Na ka prokram NRLM kila don haduh 4 lak ki longkmie kiba la pyntrei shaid shaid ïa ka kam, kila don haduh 42 hajar ki kynhun kiba la dep Form hapoh ka jingïalam ka sorkar NPP bad kala buh ïa ka thong ba hakhmat eh na ka bynta ki nongrep, la ong u Conrad.
U la pyntip ruh ba ka sorkar kala ai jingïarap ïa kino kino ki kynhun (Procedure Group) lyngba ka FOCUS ban seng ïa ki kam la jong da kaba ai ïa ka song pisa kaba mar 5 hajar tyngka, ula ai nuksa lada ki don 20 ngut kin ïoh haduh 1 lak tyngka manla ka shi snem, ym tang kata ka sorkar kala ai jingïarap sa 5 hajar manla ki nongïoh myntoi da kaba phah beit ha ki Bank Account shimet jong ki kaba long 10 hajar marwei.
Shuh shuh ula pynsngew baroh kiba ïoh jingïarap na kane ka FOCUS mynta ka sngi kin ïoh shwa mar 1,000 tyngka kum ka 1-Installment da kaba pynrung ïa ka pisa ha ki Bank Account bad ha kane ka 5 tarik u Nohprah 2022 yn pynrung sa 4 hajar tyngka kaba dei ka 2-Instalment, da kaba pynlong da ka prokram ha manla ki Block jong ki District hapoh ka jylla kaba la kot sha ka shispah klur tyngka na ka bynta ki 2 lak tylli ki longïing bad ïa kane ka prokram yn pynlong manla ka snem.
Shuh shuh ula pynkymmaw ba ‘ïa ka skim FOCUS kam dei satia kata ka sut kaba ki nongrep kin hap ban siew biang sha ka sokar, hynrei kane ka dei ka lad jingïarap bala ai duh sha ki nongrep ba kin pynkiew ïa ka kam rep kam riang hapoh ka jylla’ bad na ka liang ka sorkar ruh kan dang ïaibteng ha kine ki snem ban wan.
Ha kaba ïadei bad ki khun samla ula pyntip ba na ka liang kane ka sorkar kala ïaleh ban ïarap ïa ki da kaba sdang ïa ka prokram kaba la tip kum ka YESS Scheme, nangta da ka kiwei de kum ka Grass Root Music Program, ka Aspire Prokram, ka Prime Prokram kiba long kyrpang eh na ka bynta ki khun samla.