Nongstoiñ, Ïaïong 28: Ka jingdon jong ka surok ka surok na Rwiang shaduh Athiabari kaba jngai kumba 51 kilomitar ka la long ka jingkyrkhu kaba khraw ïa ki paitbah nongshong shnong ka thaiñ Muliang bad jong ki bynta jong ka West kiba hap ha ka thaiñ Nongstoiñ hynrei kumba ka long mynta katei ka surok ka dei kaba rit.
Kum ban pynkynmaw ba ïa katei ka surok na Rwiang haduh Ktiehthawïar kaba jngai kumba 22 kilomitar la pynbha bad siangrong naduh u snem 2011- 12 tang ha ka por ba ka sorkar Meghalya Progresive Alliance ka ïalam ïa ka sorkar jylla bad u (L) Dr Donkupar Roy u dang long kum u Myntri Rangbah. Nalor kata ka surok kaba poi haduh Athiabari kaba bteng na katei ka shnong Ktiehthawïar haduh Langja kaba don tang kumba ar kilomitar ka dang dei ka surok khyndew bad kham hadien pat ïa katei ka surok na Langja shaduh Mawthawkrah bad na Mawthawkrah la bteng da ka surok PMGSY kaba dang shu dep siangrong ha kine ki khyndiat snem ba ladep.
Ka jingpynbha bad siang rong na Tynghor shaduh Athiabari pat dang shu pyndep ha u snem ba la dep kata ha u 2023 hynrei katei ka surok ka long kaba rit. Ka jingpyndep ban siangrong ïa katei ka surok naduh Rwiang shaduh Athiabari ka dei hadien ba ka sorkar pdeng ka la shimti ban pyntrei lyngba ka skhim Pradhan Mantri Gram Sadak Yojana.
Wat la ïa katei ka surok la dep ban siang rong hynrei ka dang long kaba khim. Ha kaba ïadei bad ka jinglong jingman jong katei ka thaiñ u Bah Besralding Kharsyiemlieh secretary ka shnong Langja haba ïakren bad u nongthoh khubor u la ong ba ki paidbah ka thaiñ Muliang baroh ki kwah bad ki angnud eh ba ka sorkar kan thaw ki lad ki lynti kumno ban pynheh biang ïa katei ka surok khnang ba kan pynsuk ïa ki kali kiba kit ïa ki nongleit nongwan.
U Bah Kharsyiemlieh u la ong ruh ba katba nang mih ki sngi ki kali kiba ?aid lyngba katei ka surok la nang bun namar ba ki nongshong shnong naduh Athiabari shaneng haba ki leit donkam sha Nongstoiñ ki ïaid lyngba katei ka surok namar ka kham jan ban ïa kaba leit lyngba ka Riangdo namarba ka jingjngai na Rwiang sha Athiabari ka long tang sanphew wei kilomitar. U la ong ruh ba lada kheiñ ïa ka jingjngai na Rwiang sha Athiabari ka long kumba 62 kilomitar katba na Rwiang sha Athibari lyngba ka shnong Klangrin, Siangra, Nonglang, Langja ter ter haduh Athibari ka jingjngai bad ka don tang 50 kilomitar.
U la ong ruh ba ki paidbah nongshong shnong ka thaiñ Muliang ki dei kiba im ha ka rep ka riang bad ïa kiba bun ki mar rep ki pynïaid sha ïew Hahim bad Boko ha Assam namar ki kham jan. Nalor kata u la ong ruh ba kitei ki ïew ki dei kiba ki paidbah ka thaiñ ki sngew trai bha namar ki dei ki ïew ba la ïalam naduh ki riew tymmen ha ki por mynshuwa. Ha kajuh ka por u la ong ba na ka por sha ka por shaphang ki paidbah ki la ju pynsngew halor halor ka jingdonkam ban pynheh ïa katei ka surok bad ki la leit ban ïakynduh ïa u Bah Prestone Tynsong Symbud Myntri Rangbah ka jylla uba bat ruh ïa ka tnad PWD ban pynsgew halor ka jingangnud ha kaba u Symbud Myntri Rangbah u la kular ba un sa shim khia bad u la ong ruh ba ka sorkar kan sa ïaleh katba lah ban thaw ki lad ki lynti na ka bynta ban pynurlong ïa ka jingangnud jong ki paidbah ka thaiñ hynrei haduh kine ki sngi kim pat ïoh jingtip eiei kumta na ka liang ki paidbah ki la kyntu ïa ka sorkar ba kan shim khia bad sngew lem ïa ka jingkyrpad jong ki.
