Nongpoh, Nailur 02: Kum shi bynta ban ai mynsiem ïa ki samla pule na ka jylla Tripura kiba wan ban pule ha Union Christian College, Umbir ha Ri Bhoi kiba la pynlong ïa ka jingïakynduh lang mynta ka sngi, ka KSU seng kmie ha ka jingïalam u General Secretary, u Samla Donald Thabah mynta ka sngi ki la leit ban ai mynsiem ïa kitei ki samla pule na Tripura kum kita ki samla kiba dei na ka jaid byrniew riewlum kiba wan pule ha katei ka skulbah kaba don ha Umbir.
Kane ka dei ka jingïakynduh lang jong baroh ki Samla pule na ka jylla Tripura kiba wan ban pule thymmai ha katei ka College, ha kaba ïa kane ka jingïakynduh lang ba la tip kum ka ‘Fresher’s meet 2023 la pynlong ha Auditorium Hall ka UCC College.
Ha kane ka sngi la wan ruh ban shim bynta da u Syiem ka Tripura, u Pradyot Manikya kum u kongsan jong katei ka jingïakynduh lang ki samla pule na Tripura bad la sakhi lang ruh da ka jingdon lang u General Secretary ka KSU Sengkmie, u Samla Donald Thabah, kiwei ki dkhot ka KSU bad kynthup ruh u Maharaja Pradyot, Bikram Kishor Manikya Bahadur, Manav Debarma, Biswajit Kalai kiba dei ki MLA na Tripura, Dr Surajit Debarma, Senior Medical Officer Nazareth Shillong, Umashankar Debarma MDC, TTADC, u Richard Tripura, uba deu u President ka kynhun pule ki samla Tripura bad kiwei kiwei de.
Ha kane ka sngi, haba ai jingkren kum ka jingai mynsiem ïa kitei ki samla pule na ka jylla Tripura kiba wan ban pule ha UCC College, naduh u Samla Donald Thabah, uba dei u General Secretary bad kynthup ruh kitei ki MLA na Tripura ki la pynpaw ïa ka jingkmen ba ki samla pule ki don ïa kata ka jingïatylli na ka bynta ban pynlong kum kane ka jingïakynduh lang khnang ban ioh ban ïa kren ne ïa tai na ka bynta ka bha ka miat jong ki samla pule kiba wan ban pule ha katei ka College.
Kum ki nongïalam ki la ai mynsiem ruh ïa kine ki samla pule na Tripura ba ki dei ban don kata ka mynsiem jong ka jingïashakri lang wat la ki dei tang ki samla pule, namar haba don ka jingïatrei lang kin lait shibun ki jingeh haba ki wan ban pule ha katei ka College bad kawei ruh ki la buh ka jingkyntu ba haba wan ban pule ki dei ban pynleit jingmut ha ki jingpule bad ym ban wan rah ïa kano kano ka kynrum kynram kaba ktah pynban ïa ka shongsuk shogsaiñ ki paidbah.
La pynphuh pynphieng ruh ïa kane ka sngi da ki jingshad bad ki jingrwai bapher bapher ba la shim bynta da ki samla kiba wan ban pule na Tripura ha katei ka UCC College.
