Nongpoh, Jymmang, 11: U Prof. David R. Syiemlieh, uwei na ki riewstad ba la ïoh burom da ka Padma Shri Award bad uba long ruh u nongthoh histori ba paw ka jylla, ula leit ban ai jingkren kyrpang ha skul bah Assam Don Bosco University kaba don ha Sonapur ha ka sngi Saitjaiñ. Kane ka jingkren jong u ka long kum ka jing ai mynsiem bad ban pynshlur ïa ki samla pule ba kin buddien ïa ki sap, ki sap thoh bad ban wad bniah shaphang ka histori jong ka ri bad ka thaiñ.
U Prof. Syiemlieh uba dei ruh u dkhot jong ka Board Management jong katei ka skulbah, u la kren shibun ki kyntien kiba don ka jingmut halor ka histori, ka rukom ithuh bad pynkylla kiba lah ban ïarap ha ka pule puthi.
“Ka histori kam dei tang ban pynkynmaw ïa ki tarik ne ki jingjia hynrei ka dei ka lad ban sngewthuh shai bha ïa ka jinglong briew kaba long kum ka lad ban lum jingtip kiba khraw bad ban wad bniah ïa ki khana ki bym pat paw pyrthei,” ong u Prof. Syiemlieh.
U la pynpaw ruh shaphang ka jingwad bniah jong u ïa ki jingthoh halor ka jingdon jong ki nong Portugal sha ki jylla Shatei Lam Mihngi bad ki kot ki sla ba u la ïoh na London shaphang u Syiem Tirot Sing. U la kdew ruh shaphang ka jingdon bynta jong u ban seng ïa ka Museum jong ka Northeast India ha ophis treikam jong ka UPSC ha New Delhi.
Ha kane ka sngi, la sakhi da kii samla pule, u Vice Chancellor Fr. Jose Palely, u Vice Provincial jong ka Guwahati Province u Fr. Bivan Mukhim bad kiwei ki nonghikai ka skulbah.
La pynlong ruh ïa ka jingthung dieng bad ka jingpyni ïa ki ki riam tynrai ba la pyni da ki samla pule jong katei ka skulbah.
