Nongpoh, Jymmang, 11: Ki paidbah nongshong shnong ka Shnong Sabuda ba hap ha ka Raid Nongtung ha Ri Bhoi District bad kaba dei ruh ka shnong ba hap ha khappud ka jylla Meghalaya bad ka jylla Assam, ki la shim syndon da kawei ka rai kaba skhem ba kin nym treh da lei lei ban thep kyteng EPIC sha ka jylla Assam.
Kane ka jingshim rai ki paidbah nongshong shnong ka Shnong Sabuda ba kim trei ban thep kyrteng ïa ka EPIC sha Assam, ka dei hadien ba la wan syndon da ka shithi na ka ophis u Deputy Commissioner ka West Karbi Anglong lyngba ka election Branch ba kin pynlong ïa ka jingthep kyrteng na ka bynta ka EPIC bad ruh u Aadhar Card ha ka 10 tarik u Jymmang 2025 ha ka Shnong Sabuda.
Kumba la ïoh lum jingtip da u Nongthoh Khubor u Mawphor, la ïathuh ba ki paidbah nongshong shnong ka Shnong Sabuda bad kaba dei ruh ka Shnong ba la shong la sah tang da ki Jaid bynriew Khasi, ki la pynpaw ba kim kwah satia ban thep kyrteng EPIC ne Aadhar Card sha ka jylla Assam, kaba dei hadien ba la wan poi katei ka shithin na ka ophis u Deputy Commissioner ka West Karbi Anglong, Hamren.
La ïathuh hadien ba ki la ïohi ïa katei ka shithi ha ka 9 tarik u Jymmang 2025 ki la lym kyrkieng ïa ka jingïalang ba la shim bynta da ki paidbah nongshong shnong katei ka shnong bad ha ka jingïakren ne ïa thir sani ha katei ka jingïalang baroh naduh ki Longkpa, ki Longkmie bad ki Samla ki la shim beit kawei ka rai ba kin nym treh ban thep kyrteng EPIC lane Aadhar Card sha ka jylla Assam.
Kawei na ka rai kaba skhem ba ki la shim, ka dei ka jingpynpaw ba baroh ki nongshong shnong ka shnong Sabuda ki la dep ïoh ïa ka EPIC na ka jylla Meghalaya bad halor kane ka nongrim ki la kyntait ban leit sha katei ka jingïalang ba wan pynlong da ka Assam ba kim kwah ban don kyrteng sha Assam ha ka jingthep vote bad kynthup ruh wat ban pynrung kyrteng Aadhar Card.
Ki la pynpaw ruh ba wat ka Election Commissioner ka Ri India ka la dep ban khang ban don ar tylli ki Voter Identity Card kaba long beaiñ bad kumno pat kin dang hap thep kyrteng biang haba ki la don ïa ka Voter ID na ka jylla Meghalaya.
Kumba ki la shim rai ban nym treh ban thep kyrteng EPIC sha Assam, ba ki la don lypa ïa ka Voter ID sha Meghalaya bad ban pynpaw ïa kane ka jingpyrshah ban nym thep kyteng EPIC sha Assam, ki la phah ruh da kawei ka jingthoh ba kyrpang sha u Booth Level Officer (BLO) ban pynpaw halor katei ka phang ba kim kwah ban thep kyrteng sha Assam bad ki da kyrpad ruh ïa u BLO ba un shim khia ïa kane ka kam ban ïa kren sha u Deputy Commissioner ka Ri Bhoi lane wat sha ka sorkar jylla, kane ka dei ka sur ba la pynmih bad ba la shim rai da ki paidbah Khasi kiba shong basah ha ka Shnong Sabuda.
