Mawkyrwat, Jymmang, 11: U MP ka Rajya Sabha na Meghalaya Dr. WR Kharlukhi ha ka sngi Saitjaiñ u la plie paidbah lai tylli ki projek ba kynthup ïa ka jingpyllait paitbah ïa ka kali kit nongpang ba la mang lyngba ka skhim CMSDF 2024-25, ka projek hapoh ka Chief Minister Special Development Fund (CMSDF) 2024-25 bad na ka projek MP LADS 2024-25.
Ïa kine ki projek u MP u la pyllait paidbah ha ka shnong Rangthong, South West Khasi Hills District
Lai tylli ki projek ki kynthup ruh ïa ka jingsiang dewbilat ïa ka phyllaw jong ka Rangthong Community Hall bad ka jingshna ïa ka kynroh jong ka Dorbar Hall kaba la mang T. 9 lakh na ka CMSDF 2024-25 bad ka jingshna ïa ka jingker na ka bynta ka Dorbar Hall ha Rangthong kaba la mang T. 10 lak kawei kawei hapoh ka skhim MP LADS 2024-25.
Haba kren ha ka jingïalang, u Dr. WR Kharlukhi u la ïaroh ïa u Kitborlang Nongrem uba dei u Myntri ka shnong Rangthong uba la trei shitom ban wanrah ïa ki kam pynroi na ka bynta ka shnong Rangthong da kaba u leit ban wad, ban buddien.
Kiwei de kiba la ïashim bynta ha kane ka prokram ki long u Block Development Officer (BDO) ka Mawkyrwat C&RD Block Bah I. Lawriniang, u Myntri ka shnong Rangthong Bah Kitborlang Nongrem, ki Executive Member jong ka Dorbar Shnong Rangthong bad ki paitbah nongshong shnong.
