Ai mynsiem ka MP ïa ki shipai ba la shongthait ban ïadon bynta ha ki prokram ka Sorkar Jylla
Shillong, Nohprah 12 : Ka Headquarters 101 Area, Indian Army bad Rajya Sainik Board, mynta ka sngi Baar ki la pynlong ïa ka Ex Servicemen (ESM) Rally ha Tura ïa kaba la wan ban ïashim bynta da ki shipai kiba la shongthait bad ki kurim jong ki shipai kiba la khlad noh.
Ka MP Lok Sabha na Tura Constituency ka Agatha K Sangma, kum ka kongsan haba kren ha ka jingïalang ka la pynpaw ka jingsngewnguh ïa ka jingai jingshakri ki shipai bad ka la ong ba bun ki shipai ki la shongthait dang kloi na ka kam bad ka sorkar ka la sdang ïa ki skhim kum ka CM Elevate bad Promotion and Incubation of Market Driven Enterprises (PRIME) ha kaba kine ki shipai kin nang ïoh ïa ka lad ban pyntbit shuh shuh ïalade bad ban pyndonkam ïa ka buit bad ka sap ka jongki ha ka ban seng kam lajong.
Ka la ong, ba ka sorkar Meghalaya ka dang trei shitom ban wad ïa ki lad ki lynti ban tei ïa ka Sainik School ha ka jylla bad ka la ai khublei ruh ïa ka jingtrei shitom jong ka 58 Gorkha Training Centre bad Assam Regiment Centre ban pynthikna ba ki shipai kiba la shongthait kin ïoh ïa ka bai bam tymmen ka jong ki.
U Colonel Gautam Rai u Director jong ka Rajya Sainik Board Meghalaya ula ong ba ka Rally ha Tura la pynlong da ka jingthmu ban shimkhia ïa ki jingeh jong ki shipai kiba la shongthait na ka kam bad ïa ki ba haïing ba hasem ki jongki kiba sah ha kylleng ka rilum Garo bad ula pynthikna ba ka dei ka kamram ka jongu ban ai ka jingkyrshan ïa ki shipai kiba la shongthait bad ki ba haïing ba hasem khnang ba kin ïoh ïa ka jingim kaba lait na ki jingeh.
Ha kane ka rally la wan ban ïashim bynta da ki shipai kiba la shongthait, ki kurim jong ki shipai kiba la khlad noh bad la buh ruh ïa ki Unit Run Canteen Counter, Medical Camp bad Grievance Cells da ka Ex-Servicemen Contributory Health Scheme (ECHS), Zilla Sainik Board (ZSB) bad ICICI.
Nalor kane la phai khmat ruh ha kaba ïadei bad ka bai bam tymmen bad SPARSH (System for Pension Administration (Raksha) bad la ai jingbatai bniah ruh ha kaba ïadei bad ka ECHS, Army Welfare and Education Society (AWES) bad kiwei kiwei.