Shillong, Nohprah, 12: Ka North-Eastern Hill University (NEHU) ka la rakhe ïa ka lyngkhuh sngi ïap kaba 151 snem jong u Khlawait nongïaleh laitluid ka rilum Garo u Pa Togan Sangma.
Ha kane ka jingleh burom ha phyllaw jong kane ka skulbah, la pynïaid ïa ka jingïalang da u Prof. D. K. Nayak uba long u Vice-Chancellor incharge ka skulbah bad u Prof. S. R. Joshi, uba dei u Registrar Incharge.
Ki nonghikai bad ki samla pule jong ka skulbah NEHU ruh ki la leh burom hakhmat ka dur jong u Pa Togan Sangma bad hadien kane la pynlong ïa ka jingkren shaphang ki kam shlur jong u Pa Togan Sangma da ka Dr. Jacqueline R. Marak na ka Department of Garo, North-Eastern Hill University, Tura Campus.
Ka jingleh burom ka long da ka jingbuh syntiew hakhmat u dur jong u Pa Togan Sangma, ban pynpaw ïa ka jingsngewnguh ïa u synñiang u bynhei ba une u khlawait nongïaleh laitluid u la leh na ka bynta ka dawbah jong ka ri.
U Prof. D. K. Nayak, ha ka jingkren jong u, u la ong ba ka long kaba donkam ban rakhe kynmaw burom ïa ki nongïaleh laitluid bad ïa ki kpa tymmen kiba la len ïa la ka jong ka jingim na ka bynta ban pyllait luid ïa ka ri. U la ong ba kum kine ki jingrakhe, ki pynkynmaw ïa kane ka pateng ba mynta ïa ka jingaiti lut jong ki kpa tymmen.
Ka Dr. Jacqueline R. Marak kaba la ai jingkren halor ka jingim jong u Pa Togan Sangma ka la kdew ruh ïa kiwei pat ki riew ïaleh laitluid jong ka thaiñ Shatei Lammihngi, kiba la noh ïa u synñiang u bynhei uba ka dewbah India ka dang shu tip paidbah.
Ka Dr. Marak ka la ïathuh ruh ïa ki kam shlur jong u Pa Togan Sangma ba u la leh haba ki shipai Phareng ki la dakhol ïa ka rilum Garo. Ka la ong ba u dei u Pa Togan u dei u jrong ryngieng hapdeng ki Garo, uba la ïalam ïa la ki jong ki briew ban ïakhun markhmat ïa ki shipai Phareng ban ïada ïa la ki jong ki shnong ki thaw.
Hapoh ka jingïalam jong u Pa Togan Sangma, ki Garo kiba don ïa ki atiar tang da ki tiar ïaleh kiba rit ki la ïakhun pyrshah ïa ki shipai Phareng.
Ka Dr. Marak ka la kren ruh halor ka jingshlur jong ki riewïaleh Garo, watla kim don ïa ki tiar siat, hynrei ki la lah ban pynsheptieng ïa ki shipai Phareng lyngba ka jingshlur jong ki.
Ka Dr. Marak ka la kren ruh khyndiat shaphang ki riewshlur kane ka thaiñ Shatei Lammihngi kiba la ieng pyrshah ïa ka jingdakhol jaka jong ki shipai Phareng, kum u Sonaram R. Sangma ha ka spah snem kaba 19. Ka Dr. Marak ka la pynpaw ruh ba dei u Sonaram R. Sangma uba la lah ban pynïatylli ïa ki paidbah ka rilum Garo, ha kaba ïadei bad ka jingpyndonkam ïa ka jaka, ka jingshah dakhol jaka bad kumno ban pynneh pynsah ïa la ka jong ka khyndew ka shyiap.
