Ai mynsiem ïa ki paidbah ban ïada ïa ka khyndew ka shyiap bad kyrpad ban nym leh politik ïa ka kam pud ka kam sam

Nongpoh, Jymmang 10: Kumba ka Nongwah Mawtamur ba hap ha Jirang Constituency ka dei kawei na ka shnong khappud ba don jingïakajia pud hapdeng ka Assam bad ka Meghalaya, u MLA ka Jirang Constituency, u Bah Sosthenes Sohtun mynta ka sngi u la hiar ban leit jurip sha katei ka shnong shuwa ba ka sorkar Meghalaya bad ka sorkar Assam ki la don ha ka lynti ban pynbeit ïa ki kam pud ki kam sam ïa ki jaka kiba ym pat lah ban pynbeit ha ka wat kaba nyngkong.
Kum ban pynkynmaw, ka sorkar Meghalaya bad ka sorkar Assam ka la dep ruh ban ïa pynbeit ïa ki kam pud ki kam sam ha ka wat kaba nyngkong, hynrei ki jaka ba ym pat lah ban pynbeit mynta ka la don ha ka lynti ban pynbeit biang ha ka wat kaba ar (Phase II).
U MLA ka Jirang Constituency kum u nongmihkhmat paidbah mynta ka sngi u la hiar ruh sha katei ka shnong ban ïa kynduh ïa ki nongïalam Shnong bad ki riew rangbah, ka dei hadien ba ki paidbah ki la ud la nam ba na ka por sha ka por ba ka don ka jingthombor na ka sorkar Assam khamtam ka jingwan shna surok bad ka jingker sainar shiah kumba la pynpaw da ki nongshnong shnong ba la wan kyntur pud ruh da ka Assam shaduh u pud u sam ba hap ha katei ka Shnong Nongwah Mawtamur hapoh ka jylla Meghalaya.
Ha ka jingïalam u Rangbah Shnong, u Bah Donkupar Wahlang ryngkat ki riew rangbah ba kynthup ïa u Bah Dwen Lyngdoh, u Bah Useful Lakhmie bad kiwei kiwei ki riew rangbah da ka jingwan jurip u MLA ka Jirang, ki la ioh lad ban pynpaw ïa shibun ki jingeh jingjynjar ki padbah hapoh ka shnong ka thaw bad khamtam halor ki kam pud ki kam sam ba ki kwah ban don sha ka jylla Meghalaya bad lada phai lyngba ki kot ki sla ruh ki dang dei hapoh ka jylla Meghalaya ym sha ka jylla Assam.
Ki mat kiba la ïa kren bad pynpaw da ki nongïalam shnong bad ki riew rangbah, ka dei halor kane ka kam pynbeit pud pynbeit sam ba kim kwah ban leit sha ka jylla Assam bad ki la pynpaw ruh ba ka Shnong Nongwah Mawtamur kam dei satia ka jaka ba ïa kajia pud, hynrei katkum ki kot ki sla naduh kata ka Hima Nongwah Mawtamur ka dei kaba hap ha ka jylla Meghalaya.
Ki la pynpaw ruh ka bynta kaba hakhmat tam ka long ba ka sorkar kam dei ban ïa pynbeit pud da kaba shu rah kti ne ka mon jong ki paidbah, hynrei dei ban bishar sani da ki kot ki sla ne ka jinglong trai ha ki khyndew ki shyiap bad katkum ka jingshisha hi ka Nongwah Mawtamur ka dei hapoh ka jylla Meghalaya naduh hyndai hynthai.
Na ka liang u MLA ka Jirang, u Bah Sosthenes Sohtun ruh haba kren sha ki paidbah u la ong ba kim dei ban leh politik ïa kane ka kam pynbeit pud pynbeit sam, hynrei ki dei ban ieng skhem ha la ka nongrim bad ki dei ruh ban pynkhlaiñ ïa ki kot ki sla ban aiti sha ka Regional Committee ha kaba ma u ruh kum u MLA un don ryngkat lang bad kin ïa khun tyngeh ba katei ka Nongwah Mawatamur ka dei ban don beit ha ka jylla Meghalaya.
Kum u nongmihkhmat ba la jied da ki paidbah, u Bah Sosthenes Sohtun u la kular ruh ban shim khia ïa ki jingeh ki paidbah jong katei ka shnong khamtam ka surok bad kiwei kiwei ki kam pynroi kumba la pynpaw da ki nongïalam Shnong nalor ki jingeh ki paidbah ha ka kam pud ka kam sam ba ki wah ban don beit ha ka jylla Meghalyaa bad ym sha ka jylla Assam.