Shillong, Jymmang 10: Hadien ba ka ka jingbym lah ka party ban leh bha kumba la khmih lynti ha ka elekshon ba dang shudep, na ka liang ka TMC ha ka sngi Balang ka la lum ïa ka jingïalang jong ki nongkitkam ban ïakren halor ka jingbym lah ban leh bha ha ka elekshon ba dang shu dep bad ban pyrkhat ïa ki sienjam na bynta ban pynkhlaiñ ïa ka party shuwa ban leit sha ka elekshon.
Haba kren sha ki lad pathai khubor u Manas Bhunia uba dei u in-charge ka TMC ha ka jylla u la ïathuh ba na ka liang ka party ka la rai ban pynkhlaiñ ïa ka party naduh na ki bynta ba ha trai duh ne Grassroot level shaduh kiba sha khlieh eh.
“Ngin shong pyrkhat na ka por sha ka por kum ka party ban pynkhlaiñ ïa ka party bad ban long ka sur u paidbah bad ngin ïai long ki nongpeit pyrman ïa ki kam kiba ka sorkar ka leh bad ban pyndep hok la ka bynta,” u la ong.
U la ong ruh ba ka nongïalam ba hakhmat eh ka party ka Mamata Banarjee ka don ka jingieid bad ka jingsngewjan kaba kyrpang ïa ki paidbah ka jylla bad kan ïai long ka sur jong ki haba dawa ka kam.
Haba bynrap ïa kane u Dr Mukul u la ong ba wat la ka party ka wan sha ka jylla tang ha ki khydiat bnai shuwa ka elekshon hynrei ka jinglah ban ïoh haduh 17% ka vote share ka la dei ka dei ka dak ka shin ba ki paidbah hi ki pdiang ïa party ha ka jylla.
“Ban sdang hi ïa ka party kaba thymmai kam dei kaba suk bad ïa kane ngi la sngewthuh shai naduh kaba sdang hynrei ka jingkyrshan u paidbah ban pynjop 5 ngut ki MLA ka dei ka jingai mynsiem ïa ngi bad ngin ïai trei shitom ban ym shukor ïa kane ka jingshaniah kaba u paidbah u la bynshet ha ngi,” u la ong.
