Jowai, Jymmang 10: Ka Hill Farmer’s Union West Jaiñtia Hills District Unit ka khot ka wer ïa baroh ki nongrep sha ka jingrakhie ïa ka 31st Foundation Day jong ka Hills Farmer Union ka ban long ha ka 13 tarik u Jymmang, 2023 ha Ummulong Community Hall (Madan Khawang) ha ka shnong Ummulong, West Jaiñtia Hills District, Meghalaya.
Ha kane ka sngi kaba ka seng ka kynmaw burom ïa ka jingsdang ïa ka sengbah ki nongrep, yn wan ban sakhi lang da ki nongïalam, ki nongkitkam bad ki paidbah nongrep na ki Unit jong ka seng na baroh kawei ka jylla bad kumjuh ruh na ki Unit ki badon shabar ka jylla. Ïa ki program yn sdang ha ka por 10:00 A.M bad kan don ka jingplie pyrda (Inauguration) ban bud pat da ka jingïaphylliew jingmut hapdeng ki nongrep bad ki sahep sorkar na ki tnad bapher bapher kiba ïadei bad ka rep ka riang kumjuh ka kam ri jing ri.
Lyngba une u kyrwoh na u President ka HFU West Jaiñtia Hills District, bah Mutshwa Thabah, ka seng ka kyrpad ïa baroh ki nongrep ban pyllait por khnang ban wan sha kane ka jingïakynduh lang ki nongrep bad ruh ban pynsngew ïa ki jingeh ba ki ïakynduh kum ki nongrep khang ba kum ki nongrep ngin lah ban jop ïa ki jingeh da ka jingïatylli bad ka jingïatrei lang.
