Nongpoh, Nailur 18: Ka Federation of Khasi Jaintia and Garo People (FKJGP), North Khasi Hills District Unit lyngba ka kyrwoh ba la phah da u General Secretary, u Bah Shanlang Diengdoh ka la pynpaw ïa ka jingsngewkmen bad ai ruh ka jingkhublei kaba kyrpang ïa u MLA barim ka Mawhati halor ka jingurlong ka surok na Umsning sha Sohnidan.
Kane ka seng ka la ai khublei ïa u MLA barim ka Mawhati, u Bah Dasakhiat Lamare, ka dei hadien ba ka surok na Umsning sha Sohnidan ka dei kawei na ka surok ba ki paidbah ka Mawhati ki mad jingeh la bun phew snem mynta ha ka leit ka wan bad da ka jingshimkhia une u MLA barim ka Mawhati ki paidbah ki la suk mynta ha ka leit ka wan ba ka surok kala bit la biang bad ka la pynsuk shisha ïa ki paidbah ha ka leit ka wan.
Katkum ka kyrwoh ba la phah da utei u nongïalam u la ong ba ka seng dei ha ka por ba long MLA u Bah Dasakhiat Lamare ba kane ka surok ka la urlong bad ka dei ruh hadien ba bunsien ka seng ka la ju dawa na ka sorkar ba ka dei ban siang rong noh ïa katei ka surok bad da ka jingshim khia une u MLA mynta ka la urlong shisha halor ka jinganagnud ki paidbah ban ioh noh da ka surok kaba la bit la biang.
Kum ka seng ka ai khublei kyrpang ïa une u MLA wat la um dei shuh u nongmihkhmat ka Mawhati bad dei lyngba ka jingshim khia jongu, ba kane ka surok la bit la biang bad ka la ai jingmyntoi shibun eh ïa ki paidbah ha ka leit ka wan.
Shuh shuh, la ong ruh ba ka seng ka ai khublei kyrpang ruh wat ïa ka sorkar bad nalor kata, ka seng ka dawa ruh na ka sorkar ba kan shim khia ruh ban mang tyngka na ka bynta ban dang bteng ban siang rong ïa ka surok naduh na Sohnidan sha Umsiang khnang ba katei ka surok ha shi lynter kan bit kan biang noh bad kan long ruh ka jingkyrkhu na ka bynta ki paidbah katei ka thaiñ, ong ka kyrwoh na utei u nongïalam.
