Nongstoiñ, Nailur : Ka kam ri khñiang ryndia ka dei kawei ka kam kaba lah ban kyntiew ïa ka kamai kajih bad ka ïoh ka kot, lada ka sorkar ka lah ban thaw ki lad ki lynti ban ai jinghikai pyntbit bad pynshlur ïa ki paidbah.
Nalorkata, ka kam ri khñiang ryndia ka dei ruh kawei na ki lad ban pynjyrngam ïa ka mariang, namar ba utei u jait khñiang u im da kaba bam da ki sla dieng bad ka rukom ri ruh ka long kaba suk bha. Na utei u jait khñiang, lah ban ïoh ïa u sop bad na utei u sop la pynmih ïa ki ksai ban thaiñ ïa ki jaiñ ryndia kiba rem dor bha.
Haba phai hajuk ba mynshuwa eh, ka Jaidbynriew Khasi ka ñiewkor bha ïa ki jaiñ muka naduh ki riew tymmen, ki riew rangbah bad ki riew don burom ki ju pyndonkam ha kaba spong ïa ka khlieh, ban pynpaw ba ki dei ki riew don burom. Kiba kham pyndonkam ban spong da ki jaiñ muka, ki dei ki Syiem bad kiba khraw batri jong ki Hima, kum ki Lyngdoh, ki Basan nangta ki rangbah kur bad ki nongkñia.
Ha ka jingïadei bad kane ka bynta, ka Sericulture Department ha ka jingshisha ka dei ka tnad treikam jong ka sorkar kaba peit bniah ban ïa katei ka bynta. Hynrei ka sorkar imat kam da shimkhia than ban pynkhlaiñ ïa katei ka tnad treikam, kumta ka shu neh sah hajuh haduh mynta.
Ka jingdon jong kitei ki jaka ri khñiang muka la lap ba ki don katto katne tylli ki jaka ha West Khasi Hills kiba la ithuh da ka sorkar kum ha Nongshillong, Nongritong, Nongdaju bad Umsohpieng bad kaba kham idei kum ka jaka ba la sumar kyrpang ka dei tang kawei kaba don ha Umsohpieng. Lait nangta ïa kitei kiwei pat ki jaka imat ka sorkar ka la shu ieh kumto.
Utei u jait khñiang ruh u dei u ba ai jingmyntoi haduh katta katta ïa ki paidbah ym tang ha kaba ki pynïaid ïew ïa u sop hynrei ki pynïaid ïew ruh ïa u ksaiñ u ba ki la kynther na u sop ynda la dei ka por shuwa ba un kylla ‘ñianglong.
Ka dor ïew jong u khñiang ryndia ka poi haduh saw spah tyngka shi kilo ha ïew Nongstoiñ. Namarkata kum shi bynta ban kyntiew ïa ka ïoh ka kot jong ki paidbah, nangta ban ïarap pynjyrngam ïa ka mariang bad ban lait na ka jingtwa jong ka khyndew, ka sorkar ka la dei ban shimkhia da kaba thaw ki lad kumno ban pynshlur ïa ki paidbah lyngba ki lad jingïarap bad ban ai ki jinghikai kiba paka khnang ba ki paidbah kin kham ïabeh sha katei ka kam.
