Ai khublei ka DS Thangskai ïa ka JSU kaba treilang haduh ban da lah pynduh pyndam ïoh bhah pule doktor u samla bar jylla na bhah ka jylla

Khliehriat, Risaw 04 : Ki nongïalam shong jong ka shnong Thangskai, East Jaiñtia Hills District ha ka jingiakynduh lang jong ki mynta ka sngi bad ki nongïalam jong ka Jaiñtia Students Union ha Khliehriat, ki la pynpaw ka jingsngew nguh bad ai khublei ïa ka seng JSU kaba la kloi ban ai ka jingïatreilang bad ka shnong ha kaba ïadei bad ka jung pynduh pynsam ïa ka jingioh bhah uwei u bar jylla, u Ayush Kumar uba thmu ban leit pule MBBS na ka bhah jong ka jylla Meghalaya, la ong ba ka seng lem bad ka Dorbar Shnong ki la iaid lynti lang haduh ban da jop.
Haba kren ha ka jingïalang ba kyrpang, u Waheh Shnong Thangskai, u bah Phaibiang Syrti bad u Secretary Shnong Thangskai, u bah Treibor Suchen, ki la pynpaw ka jingsngew nguh bad sngew burom ïa ka seng JSU Central Body bad ka JSU Khliehriat Circle kiba la kloi ban iarap lem ïa ka shnong ha ka jingiaid lynti ban pynduh pyndam noh ïa ka kyrteng u tei u bar jylla uba mut ban leit pule Doctor na ka bhah jong ki nong Meghalaya.
U bah Phaibiang Syrti, u la iathuh ba na ka liang ka shnong hi ka la ai ïa utei u bar jylla tang ïa ka syrnot Temporary Residential hynrei u kpa jong u Ayush pat u la pyndonkam bakla ïa ka syrnot “ynda ngi iohi ha ki khubor ïa ka jingioh leit pule utei u bar jylla ngi kum ka shnong ngi la kyndit bad pyrkhat kumno une u bar jylla u ioh, haba ngi ai ïa u tang ka syrnot temporary Residential, kumta ngi la ïa shong jingïalang ha shnong bad ngi la iathuh ruh ha ki nongïalam ka seng JSU, kumta na ka liang ka seng ruh ka la kular ba don lang bad ngi kum ka shnong kumta ngi sngew ioh bor bad ngi la ïa iaid lynti lang haduh ban da jop, ngi da sngewkmen ba ka seng ka la iarap lem ïa ngi kum ka shnong, ka JSU ka don ïa ka mynsiem ban ïatreilang bad ka shnong kaba kloi ban kit lem ha ka jingeh jong ka shnong” ong u bah Phaibiang Syrti bad u la ai ruh ka jingkhublei ktbok kitrwiang ïa ka seng hi baroh kawei ba kan nag lah ban kiew shaphrang ha baroh ki kam ba bha na ka bynta ka ri bad ka jaitbynriew.
U bah Treibor Suchen ruh u la iathuh ba kitei ki dkhar ki la pyndonkam bakla ïa ka syrnot ba ai ka shnong Thangskai bad u la kyrpad bad kyntu ïa baroh ki Dorbar Shnong ba nangne shakhmat ban long noh kiba husiar ban ai syrnot ïa ki briew kiba na bar ka jylla “Ha kato ka por ba ngi ai ïa kane ka syrnot Temopary Residential ngim poi pyrkhat ba kan long da kumne, ngi ai ïa ka syrnot ba tang shi por tang lada ki donkam ha bank lane haba leh sim card hynrei u kpa jong u Ayush Kumar pat u la pyndonkam bakla ïa kane ka syrnot, haba ngi tip ïa kiei kiei ngi kum ka shnong ngi sngewsih haduh katta katta, kumta na ka liang ka Dorbar Shnong ngi la wad ki lad ki lynti kumno ban weng noh ïa ka kyrteng jong u na ka thup kyrteng jong kiba ioh ban leit pule MBBS bad sngewkmen ban ong ba ngi la kynduh ïa ki nongïalam jong ka JSU Central Body bad ka JSU Khliehriat Circle kiba kloi ban iarap lem ïa ki para doh para snam bad kiba la iarap lem ha kane ka jingiaid lynti jong ka shnong”
U President Jaiñtia Students Union Central Body, u samla Jersom Shylla u la ong ba “ka seng ka la sngewsih haba iohi ba don u bar jylla ruh uba na East Jaiñtia Hills District, uba la ioh leit pule na ka bhah jong ka jylla, kata hadien ba u la ioh ïa ka Temporary Residential Certificate na ka shnong Thangskai bad hadien ka jingiaid lynti, ka seng ka la lap ba bad sngewthuh ba u Rangbah Shnong Thangskai u la ai ïa ka Temporary Residentia Certificate ïa utei u bar jylla hynrei kitei ki bar jylla pat ki la shim kabu pynban da kaba pyndonkam da kane ka Temporary Residential Certificate bad ki la leit pan ïa ka Permanent Residential na ophis u Deputy Commissioner bad ka ophis u DC ruh ka la ai ïa ka syrnot ïa utei u bar jylla ha u snem 2021, ha ka jingshisha ka ophis u DC ka la dei ban bishar bad peitbniah bha shwa ban ai ïa kata syrnot”
Utei u nongïalam ka JSU u la iathuh ba na ka liang ka seng ki la iaid lynti shuh shuh shakhmat bad buddien ïa kane ka kam, ki la buh da ka jingujor ruh halor kane ka jingioh bhah utei u bar jylla bad dawa ba dei ban weng noh ïa ka kyrteng jong u Ayush Kumar na ka thup ban leit pule bad dawa ruh ban pyndam noh ïa ka Permanent Residential Certificate bad kane ka jingiaid lynti kam shym long lehnoh ei satia bad mynta ka la poi sha ka thong haduh ba mynta la lah ban pynduh bad pyndam ïa ka kyrteng jong u Ayush Kumar uba thmu ban leit pule MBBS na ka bhah jong ki nong Meghalaya “ka seng ka buh ruh ïa u kyrwoh khubor sha baroh ki bar jylla kiba don ha ri lum Jaiñtia ba katba dang don hi ka JSU, kane ka seng kan nym ailad ban kum kane kan nang ïai jia nangne sha khmat, kawei ruh nga kyrpad ïa baroh ki Ragbah Shnong ha ri lum Jaiñtia ba ki dei ban da peit bad bishar bniah bha ha kano ka bynta ba dei ban ai bad ha kano ka bynta ba ym dei ban ai ïa ki syrnot ba shi por khnang ban lait na kino kino ki bynta ki ban ktah ïa ka jaitbynriew bad ngi ruh kum ka seng ngin iai don ryngkat lang ban ai bor ai mynsiem ïa ki shnong” ong u samla Jersom Shylla.
U President JSU Khliehriat Circle, u samla Livingson Sama, u ai khublei bad kitbok kitrwiang ïa ka shnong Thangskai kaba la ioh biang ïa ka burom sa shisien ha kaba iadei bad kane ka jinglah ban pynduh pyndam ïa ka jingioh bhah ute u bar jylla uba shim kabu ïa ka shnong bad ong ruh ba na ka liang ka seng kan iaid don ryngkat lang bad ka shnong ha kino kino ki jingeh.
Kiba la ai jingkren ki kynthup ruh u Secretary JSU Khliehriat Circle, u samla A.Lyngdoh.