Ai jingithuh ka KHADC ïa ka Dobar Ki Khasi 5 shnong ha Ri Bhoi, ai khublei ïa u CEM

0

Nongpoh, Rymphang 04: Da ka mynsiem ka jingkmen halor ka thong ban ïoh la ka jong ka jingsynshar laitluid kum ki khun Khasi Khara, ka Dorbar Ki Khasi 5 Shnong, kaba kynthup ïa ka Shnong Mawtnum, Umjarasi, Iewmawlong, Umbuda, bad ka Mawphrew, ki la pynpaw ïa ka jingsngewnguh kaba khraw ïa Khasi Hills Autonomous District Council ha ka jingïalam u Bah Pynïaid Sing Syiem kum u Chief Executive Member (CEM) ki la pynurlong ïa ka jingdawa kane ka Dorbar ki Khasi 5 shnong ha Ri Bhoi District.
Kumba la pynpaw da u Bah C.B Syiem kum u shongknor katei ka Dorbar Ki Khasi 5 shnong ha Ri Bhoi District, ka daw kaba ki la ai khublei kyrpang ïa u Bah Pynïaid Sing Syiem kum u CEM ka KHADC ka dei halor ka jingshim khia jong u ban ai noh ïa ka jingsynshar ba laitluid noh da ka Raid bad ban lait noh na ka jingsynshar ka Raid Marngar, ba hap ha ka Hima Mylliem.
U la pynpaw ruh, ka daw kaba ki la dawa na ka KHADC ban ïoh noh la ka jong ka Raid kata ka Dorbar ki Khasi 5 shnong, ka dei namar ba kim sngewïahap satia ba kitei ki 5 tylli ki shnong kin hap ha ka jingsynshar ka Raid Marngar, kaba la ïa pher naduh ka ktien ka thylliej, ka riam ka beit, ka riti ka dustur bad kumba la pynpaw da u Paiem Latho Manik Syiem ha ki lad pathai khubor, la kren shai ba ki jaid bynriew Marngar kim dei ki khun ki hajar bad ki dei tang ki raiot ba kim sngewïahap ba ki raiot kin synshar ïa ki khun ki hajar kiba dei ki jaid bynriew Khasi Khara.
U Bah Syiem u la pynpaw ba ïa kane ka kam ki la sdang ban dawa la ka jong ka jingsynshar ne ban ithuh noh kum ka Raid ha katei ka Dorbar ki Khasi 5 shnong, ka dei naduh u snem 2007 bad ruh ha u snem 2010 u Syiem Mylliem u Paiem Latho Manik Syiem (Bamkwai ha Dwar U Blei) u la ai ka jingkular ban ithuh noh ïa kanne ka Dorbar ki Khasi 5 Shnong kum ka Raid hapoh ka Hima Mylliem bad kane ka shym la sei soh satia, hynrei dei lyngba ka jingbuddien bad ka jingïaid dawa ba ha kane ka kynti ka jingshimti u Bah Pynïaid Sing Syiem kum u CEM kane ka jingdawa ka la urlong ha kaba ha ka 21 tarik u Kyllalyngkot 2025 ka KHADC ka la pynmih syndon da ka hukum ban ithuh ïa kane ka Dorbar ki Khasi 5 shnong, kaba dei hadien ka jingbishar bad ka jingwad bniah halor ka jingdawa jongki.
Na ka liang ka Dorbar ki Khasi 5 shnong, ki ai khulei kyrpang ruh ym tang ïa u CEM ka KHADC u Bah Pynïaid Sing Syiem, hynrei ka ai khublei naduh ki nongïalam barim kum u Bah J.W Lapang, u Bah Biren Syngkli, u Bah Lurshai Wahlang bad kumjuh ruh ki ai khublei kyrpang ïa ka seng KSU North Khasi Hills District, ka FKJGP North Khasi Hills District bad ruh ïa ka Synjuk ki Rangbah Shnong Ri Bhoi District kiba la ai ka jingkyrshan kaba pura haduh ba kane ka jingdawa ka la urlong.

Leave A Reply

Your email address will not be published.