Ai dorkhas ka MPUF ha u DC halor u surok NH-6 ha ki bynta ka Tuber bad Ladrymbai

Jowai, Nailar 18: Ka Meghalaya Peoples United Front (MPUF), East Jaiñtia Hills District, lyngba u President jong ka, u bah Kyrshan Blah, ka la aiti ïa ka dorkhas sha ka ophis jong u Deputy Commissioner, East Jaiñtia Hills District ban dawa maramot ïa ka surok NH-6 kaba la sniew bad ban buh ruh ïa ki jingker ha Tuber bad ki dak jingmaham.
Na ka liang u bah Kyrshan Blah ha ryngkat ki dkhot ka MPUF ki la leit ban jurip ïa ka surok NH-6 bad hadien kane kila leit kynduh ïa u Deputy Commissioner u Manish Kumar, IAS, u bah Blah ban pynsngew ïa ka bynta turning ha Tuber namar ka jinglong bym shngaiñ ïa ki paidbah nongleit nongwan, ha kaba ka seng ka la ïoh shibun ki jingujor na ki nongñiah kali.
U Deputy Commissioner ula kubur ïa kane ka jingeh kaba ktah ïa ki nongleit nongwan bad ki nongñiah kali. Ka MPUF ka la kdew ba ka jingtrei pynheh ïa ka bynta ha Tuber turning kam pat biang bad ki don bun ki thliew ha shi lynter surok ki bym pat dep ban shna kaba la buh jingma ïa ki nongñiah kali naduh ki kali rit bad ki kali heh kumjuh.
Ka MPUF ka la pynpaw ruh ïa ka jingsngewkhia halor ki bynta jong ka surok kiba la shah pynjulor bad ki thliew ha Ladrymbai kynthup ha kawei ka jingkieng.
Hadien ka jingïakren u bah Blah ula ai khublei ïa u Deputy Commissioner uba la shimkhia ïa kane ka kam bad u la kyntu ruh ban buh ïa ki street light bad ban ker kynroh ha Tuber turning.
Halor kane ka MPUF kala ai por shibnai ban leh eiei bad ka la maham ba lada ym pyn urlong ïa ki jingdawa jong ka, kin sa shong jingïalang bad ka CEC khnang ba kin pyrkhat da kiwei pat ki sienjam.