Ai dorkhas ka HYC ha u CEM ka KHADC ba ïoh khaïi laitlan ki bar jylla ha Ri Bhoi District

0

Nongpoh, Jymmang 15: Ka Hynniewtrep Youth Council Ribhoi District ha ka jingïalam u President, u Bah Hercules Suting mynta ka sngi ki la leit ban kynduh ïa u CEM ka KHADC ban aiti ïa ka dorkhas bankyrpad ïa ka Council na ka bynta ban tehlakam ïa ki kam khaïi laitlan ki bar jylla ha Ri Bhoi District khlem da biang ki kot ki sla.
Kane ka jingleit kynduh ka seng ïa u CEM ka KHADC, u Bah Titosterwell Chyne ka dei ruh halor ka nongrim ba ka seng ka sngewkhia ïa ka jingioh laitlan ki bar jylla ban sengkam sengjam bad ban kamai spah ha ki thaiñ Ri Bhoi naduh na Umsning, Nongpoh, Byrnihat, Khanapara bad kiwei kiwei ki bynta ka District khlem da don ki trading bad ki labour license.
Na ka liang ka seng ha ka jingkynduh ïa u CEM ha ka ophis treikam jong u, ki la ioh ban aiti ia ka dorkhas ban kyrpad ïa ka Council ba ka shim khia ban phah tohkit bad ban nym ailad ïa ki bar jylla ba kin shuh ïoh bsuh khlieh ha ki kam kamai kajih khlem da bud ïa ki kyndon aiñ ne ioh jingbit na ka Council.
Ka seng ha kaba aiti ia katei ka dorkhas ka la kyrpad ruh ïa ka council ba kan pynlong ïa ka jingkhynra ha Ri Bhoi District khnang ban lah ban tehlakam ïa kine ki kam khaïi beaiñ ki bar jylla kiba ktah kylla ïa ka ïoh ka kot jong ki trai muluk ki trai jaka ba la jan baroh ki jaid kam la wan bsuh khlieh da ki bar jylla
Na ka liang ka seng ka la pynpaw ruh ka jingkhublei ba kyrpang ïa u CEM uba la kular shim khia halor ki mat ba la wan rah da ka seng bad kum ka seng ruh kan ai ïa ka jingïatreilang ban khanglad na kine ki kam khaïi beaiñ ki bar jylla, la pynpaw u Bah Hercules Suting kum u president ka HYC na Ri Bhoi District.

Leave A Reply

Your email address will not be published.