AFC U-17 Asian Cup Qualifier:Pynbam kput ka India haduh 13 kol ïa ka Brunei, ïoh pynkhihjar u Manbhakupar

Chonburi Stadium, Risaw 24: Ka kynhun ïalehkai phutbol Under-17 jong ka India ka la sdang ïa ka lynti ïaid kaba seisoh na ka Group D ha ka lympung AFC U17 Asian Cup Qualifiers, da kaba pynjemkhnap ïa ka Brunei Darussalam haduh 13-0 kol ha ka jingïalehkai kaba nyngkong ha Chonburi Stadium – Thailand ha ka sngi Balang.
U samla Manbhakupar Malngiang, uba la shah jied ban don lang bad ka kynhun ba 23ngut jong ka Ri, u la long u wei napdeng ki player ban ïoh pynkhihjar ha kane ka jingïakhun.
Watla u Manbhakupar, u la mih madan kum u player bujli (substitute) ha kane ka jingïakhun, hynrei kane kam shym la khanglad satia ïa u ban pynpaw ïa la ka sap ba kyrpang bad ban ïoh pynkhihjar na bynta ka ri.
Ha kane ka jingïakhun, ka India ka la sdang ban thombor naduh ba sdang bad ha ka minit kaba phra, u Vishal Yadav u la shem ïa ka kol kaba nyngkong. Hadien 16 minit, u Md Arbash u la pynkhih ïa ka kol kaba ar bad nangta ïarap pashat ïa ka bol sha u Vishal na bynta ka kol kaba lai.
Ka jinglah ban ïalehkai bha u Arbash ka la bteng ban wanrah jingma ïa ka Brunei ha kaba u la ïarap pashat bol na bynta u Bharat Lairenjam ban pynkhih ïa ka kol kaba saw ha ka 38 minit. U Mohammed Kaif u la nang pynskhem ïa ka kynhun lyngba ka kol jong u ha ka minit ba 42.
U Vishal u la pyndep ïa ka hat-trick hadien 6 minit ba la bteng ïa ka kylla miet. Hadien kane, u coach Ishfaq Ahmed u la rai ban tynjuh ïa ka jingkhlaiñ jong ki player shong ben da kaba ailad pat sa ïa ki ban mih madan.
Tang hadien katto katne por, u kapten ka kynhun – u Ngamgouhou Mate u la thep sa ïa ka kol ba hynñiew shuwa ba u Manbhakupar Malngiang un pynkhih ïa ka kol kaba phra ha ka 74 minit, da kaba pashat tyllun ïa u rangapkol ka liang pyrshah shuwa ban thep suk shapoh kol.
U Hemneichung Lunkim, uba la long u wei na ki player ba kynsai tam jong ka India— u ba khlem pat ïoh thep— ha kaba khadduh u la ïoh ban pynkhih ïa ka kol jong u ha ka 82 minit. Tang kumba katto katne minit, ka India ka la kynjoh syndon 10 kol lyngba u Azlaan Shah kaba la ïarap pashat da u Rishi Singh.
Ka India ka la ïoh ban thep sa ar kol ha ki minit ba khadduh jong ka jingïakhun, lyngba u Mahmad Sami bad u Sumit Sharma. Hynrei ka jingïalehkai kam shym la kut hangne, naba ka India ka la ïoh ban pynkhih sa kawei ha ki minit pynjlan jong ka por lyngba u Usham Thoungamba Singh.
Ka kynhun India kan pynkhreh ban aireng sa ïa ka Turkmenistan ha kane ka sngi Thohdieng (25 tarik Risaw, 2024) katba ka Brunei kan ïakhun pyrshah ïa ka Thailand.