Nongpoh, K’Lyngkot 29: Ka FKJGP Baridua Circle ka la pynpaw ïa ka jingsngew sarong hadien ba ka la khur ïa ka nam lahduh ha ka jingïalehkai kriket phainal jong ka 1st B. Sohpdang Cricket Cup, da kaba pynliem ïa ka Sonapur Bulls na Assam. Ïa kane ka lympung la pynlong ha Madan Sohjer, 9 Mer, Baridua, Ri-Bhoi District.
Ha kane ka lympung ba nyngkong eh, haduh 16 tylli ki club na Meghalaya bad Assam ki la wan ban shim bynta hapdeng ka jingïakhun kaba jur ban ïaknieh ïaka nam lahduh, ka kynhun FKJGP Baridua Circle bad ka Sonpur kila poi shaduh ka phainal ban ïaknieh ïaka nam lahduh.
Haba phai sha ka jingïalehkai, ka FKJGP Baridua ka la jied ban tied nyngkong bad ka la lah ban kamai haduh 190 run na ki 12 over bad duh noh 4 wicket. Haba beh ïaka thong ka Sonapur Bulls, da ka jinglah ban teh lakam ki nongkawang bol ka FKJGP kila ioh ban khur tang 104 ron naki 12 over bad duh haduh 8 wicket bad pynrem syndon ïaka Sonapur Bulls da 87 ron.
Naka liang ki bor pynïaid kila sam ruh da ka khusnam ha kaba ka FKJGP Baridua kaba la rah ïaka nam lahduh kala ioh ban khur ïaka song pisa kaba T.40000/- ryngkat ka trophy katba ka Sonpur Bulls kaba la rem noh haka jingïakhun phainal kala rah ïaka song pisa kaba T.20,000/- ryngkat ka trophy.
Ha kane ka jingïakhun phainal la sakhi ruh da ka jingdonlang u Syiem ka Raid Marwet, u Païem Ken Syiem, kum u kongsan, ryngkat bad u Rangbah Shnong Baridua, u Bah Ioanis Narleng, kum u symbud kongsan. La don lang ruh u Secretary Shnong, u Bah Rick Lapang, ki nongïalam ka Sohjer Committee, bad kiwei kiwei ki riew rangbah jong ka thaiñ.
