Kyrmen u Bah Lahkmen ba ka Ministry ban leh eiei ban weng noh ïa ka jingeh ha skul bah NEHU

Shillong, K’Lyngkot 23: U Myntri sorkar ba peit ïa ka tnad pule puthi, u Bah Lahkem Rymbui u la ong ba u kyrmen ba ka Ministry of Education kan wanrah noh ïa ki lad ban weng noh ha kaba ïadei bad ka jingeh ha ka skul bah North Eastern Hill University (NEHU).
U myntri ka tnad pule puthi ka jylla u la ong ba ïa ka jingïehnoh kam u Pro Vice Chancellor jong ka NEHU, Shillong Campus u Bah Sumarbin Umdor ym shym pat la pdiang satia.
U Bah Lahkmen u la ong ka jingbym don u Pro Vice Chancellor ha Shillong Campus jong ka North Eastern Hill University kala ktah ïa ka jingtrei kam jong kane ka skul bah.
U bah Rymbui u la ong ba shisien ba ka head quarter ka la shah ktah kan don beit ka jingktah ïa ki college kiba ïasoh bad ka.
Ha kajuh ka por u la kyntu ïa u Bah Umdor ban leit phai biang sha ka kam namar ba ïa ka shithi risain ym shym pat la pdiang.
“Na ka bynta ka bha ka miat jong ki samla pule bad ki nongtrei jong ka NEHU katba dang ap ïa ka rai ba khatduh u Pro Vice Chancellor ba mynta un sdang biang ïa la ka kam,” u la ong.
U Bah Rymbui u la ïathuh ba u dang ïakren bad baroh ki nongïa don bynta ha NEHU bad u dang ïakynduh ruh bad ka Ministry of Education.