Suhthied ka jingïalehkai siat pistol bad suloi ha Nongstoiñ, haduh 70 ngut shah hikai ki khynnah skul

Nongstoiñ, K’lyngkot 23: Ka kam ïalehkai sports kaba thymmai kaba la tip kum ka ‘Shooting’ lane ïa siat pistol bad suloi, ka la suhthied ha Nongstoiñ West Khasi Hills, ha kaba ka Shooting Association of West Khasi Hills (SAWKH), ha ka sngi palei 22 tarik Kyllalyngkot 2026, ka la sdang ïa ka prokram ai jinghikai sha ki samla ba dang khie dang san jong ka thaiñ Nongstoiñ.
Kane ka prokram ba ar sngi jong ka SAWKH ka dei kaba la ithuh bad ïoh jingkyrshan borbah nyngkong eh da ka Shooting Association of Meghalaya ryngkat ka Directorate of Sports and Youth Affairs, song pisa na ka CMYDS, ha kaba ka lah ban pynurlong ïa ka prokram ban wad ïa ka sap kyrpang ryngkat ban ai jinghikai pyntbit ïa kaba la tip ruh kum ka, ‘Talent Search cum Coaching and Awareness Programme’.
Kane ka prokram la ïoh ban pynlong nyngkong eh ha Mount Hermon Academy Secondary School New Nongstoiñ, ha kaba ki la don kumba 70 ngut ei ei ki samla pule kynthei bad shynrang na ki skul bapher bapher jong ka sor Nongstoiñ, kiba la wan ban pynrung kyrteng ïalade bad shah hikai ha ki nongïalehkai ïa siat kiba dei ruh nonghikai kiba la paw jong ka Shooting Association of Meghalaya.
Napdeng kine ki samla la shim jied noh tang kiba tbit tam kata hynriew ngut ki samla kynthei bad shynrang ha ka Air pistol, katba ha ka Air rifle ki long kumba 24 ngut ei ei.
Ha ka sngi palei shwa ka prokram ban ai jinghikai, la ïoh ban pynlong ïa ka jingïalang kaba lyngkot ha phyllaw jong ka skul, ha kaba u Bah Despitol Sun President jong ka Shooting Association of West Khasi Hills u la ïoh ban pynïaid, ha ryngkat ka jingdonlang u Rev B.Thongni kum u symbud kongsan, u Bah Edilbert Lyndem RO Planning Officer kum u kongsan.
Haba ai jingkren u Rev B.Thongni u la pynpaw ba ha man la ki jingïalehkai ka don beit ka jingïadei ha ka jingim jong u briew, kata ka dei ka jinglong ba ngi don ïa ka thong bad kaba ar pat ka dei ba ka pynlong ïa ngi ba ngin don ïa ka jinglong ryntih. Kumta ha ka kam sports ïasiat pistol bad suloi ruh ka long hi kajuh ba ngi hap ban don ïa ka thong lane ka target, da kaba ngi dei ban long kiba pynleit jingmut skhem bad ban im ka jingim kaba beit bad kaba ryntih.
U Bah Edilbert Lyndem haba kren kum u kongsan u la ong ba haba kum kane ka sports kaba thymmai ka wan ban jngoh ïa ka Nongstoiñ bad ïa ka District, ka long ka khubor kaba kmen na ka bynta ki samla kyrpang eh ki ban ïoh ïa ka lad ban sei ïa ka sap ka phong kaba ki don.
U la ong ruh ba haduh 95% kane ka jingïalehkai ka dei beit ba pyndonkam da ka bor jabieng. Ngi donkam ban pyndonkam hok ïa ka sap khnang ba ha kawei ka sngi ngin sa poi sha ka thong da kaba ngin pynleit jingmut ha kata ka sap ba ngi don.
U la ai mynsiem ruh da kaba ong ba lehse kane ka jingwan hiar kjat jong ki nongïalam ka Shooting Association of Meghalaya, kan pynmih ïa ka khubor ba ki don ki samla na kane ka dong ka thaiñ kiba kiba don ïa kata ka sap ka phong hapoh jong ki. Lehse ha kine ki ar sngi ki nonghikai kin lap ba ki don shisha ki samla kiba don lawei ha ka Shooting, kata ka dei ka khubor kaba kmen bad kyrmen ba lehse ha kawei ka sngi kin sa lah ban rah ïa ka nam ka burom ha ka District bad ha ka Jylla.
Na ka liang u kongsan u la ai khublei kyrpang ïa ka Shooting Association of West Khasi Hills, ba kan nang ïaid shakhmat bad trei shitom na ka por sha ka por. U la kular ruh ba na ka liang jong u, un kner katba don ki lad ki lynti ban ïarap ban kyntiew lem ïa kane ka Association ha ki jingpyrshang jong ka.
Kiwei kiba la sakhi bad donlang ha kane ka sngi sdang ki long u Bah Neil Sootinck General Secretary Shooting Association of Meghalaya, u Bah Hamar Lyngkhoi Vice President Shooting Association of West Khasi Hills.
Nangta u Bah Mawdaker Marweiñ nonghikai ha ka Air Pistol bad Dennison Kyrsai nonghikai Air Rifles 177, Bah Antony Lakiang nonghikai Air Pistol bad Bah Hame M.Pdah nonghikai Air Rifle.