Shillong, K’lyngkot 23 : Ka jingïakhun mynta ka sngi ha ka SSA U-14 bad kumjuh ha ka U12 Football league 2025-26 kaba long ha madan SSA, Polo, ka la long kaba shongshit bha haba la don ruh ki kynhun kiba la jop bun kol bha baddon pat kiba shu jop da ka said.
Ha ka jingïakhun kaba nyngkong jong kiba hapoh 14 snem ka rta, ka Nongrah ka la jop da 3-0 kol ïa ka Mawtawar, katba ha ka jingïakhun kaba ar ka Nongthymmai ka la pynliem da 2-1 kol ïa ka New Challenger.
Katba ha ka jingïakhun kaba lai, ka Pynthorbah SC ka la pynliem noh ïa ka Sohiong SC da 2-0 kol. Ha ka jingïalehkai kaba saw pat ka Langsning ka la pynliem haduh 6-0 kol ïa ka Mawlai SC. Katba ha ka jingïakhun kaba san, ka Lumshyiap ka la pynliem noh da 3-0 kol ïa ka Nongkohlew SC.
SSA U12 : Ha ka jingïakhun jong ka SSA U-12 Football league 2025-26 pat, ka Diengpasoh ka la shah rem noh haduh 4-0 kol ha ka Shillong Lajong, katba ka Marbisu pat ka la pynliem da 2-1 kol ïa ka Laitkyrhong SC.
Ka Mawshbuit SC pat ka la mad ïa ka namrem da 1-0 kol ha ka jingïakhun pyrshah ïa ka Nongkohlew, katba ka Pynthorbah pat ka la ïoh ban pynliem haduh 6-0 kol ïa ka Rangdajied United SC.
Ha kawei pat ka jingïakhun, ka Nongthymmai Nongkynrih ka la ïoh ban pynliem noh da 2-0 kol ïa ka Langsning SC, katba ka Smit SC pat ka la mad ïa ka jingshah rem da 2-1 kol ha ka jingïakhun pyrshah ïa ka Summit Academy.
Ha ka jingïakhun kaba 7, ka Nongthymmai SC ka la shah rem da 4-1 kol ha ka PFR A, bad ha ka jingïakhun kaba phra, ka Umphyrnai ka la pynliem noh da 3-0 kol ïa ka Lumshyiap SC.
