Hapoh 6 bnai sorkar sngewbha shna noh ïa ka surok na Lai Lad sha Borsora : SSHL

Mawkyrwat, K’Lyngkot 21 : Ka Seng Samla Hima Langrin mynta ka sngi ka 21 tarik kyllalyngkot, 2026 ki la hiar jurip ïa ka surok Intermediate kaba dei na Lai Lad sha Borsora ka don ïa ka jingjngai kumba 6 kilometre tam ei ei kaba dang sah khongreng khlem pat shna pynbha haduh mynta bad wat u kontraktor ruh um pat shem la pyntrei katkum ka por ba ka sorkar ka la buh ban pyndep ïa kane ka surok.
Ïa ka jingleit jurip la lam khmat da u bah Pynshailang Lyngdoh uba dei u President ka Seng Samla Hima Langrin ryngkat ka jingïadonlang ki riew rangbah jong ka Hima Langrin kum juh ruh ki samla ka Hima Langrin.
Ha kane ka jinghiar jurip, ka Seng Samla Hima langrin ka la lap ba ia kane ka surok dang trei tang malu mala, ka dang sneiw hi kumjuh kumba ka long mynshwa namar ia kane ka surok ym dei ba dang sdang thymmai hynrei ka dei ka surok kaba la don lypa ka dei ka surok tang ban pynheh bad siangrong, hynrei kumba 3 snem mynta ka la iaid pynban ka surok ka dang sah kum juh.
Lah ban pynkynmaw ba ïa kane ka surok la mang pisa 18 klur na ka Special Assistance to State Capital Investment jong u snem 2022-2023 bad ka don ïa ka jingjngai ba 6 kilometre. U Symbud Myntri Rangbah ka Jylla Meghalaya, u bah Prestone Tynsong u la kular ruh ban pyndep ïa kane ka surok tang hapoh 24 bnai, ha ka jingkren jong u ka jingïalang ba la long ha ka 13 tarik u Naiwieng, 2023.
Kumta, u bah pynshailang Lyngdoh, president ka seng samla hima langrin haba ai jingkren ha ki lad pathai khubor u la kyrpat jur ïa ka sorkar bad kum juh ruh ia u bah Prestone Tynsong uba dei u Symbud Myntri Rangbah ka jylla Meghalaya bad ïa ki tnad trei kam kiba dei khmih ïa kane ka surok ba kin pyndep noh hapoh 6 bnai bad lada ka sorkar ka dang leh mynthi ïa ka jingkyrpad jong ka Seng Samla Hima Langrin.
“Lada kam pyntreikam ne sngap myntri bad ym pynurlong ïa ka jingdawa, ka seng kan shim da kiwei pat ki sien jam kiba kham tyngeh”, ong u President ka Seng Samla Hima Langrin.