Jowai, K’Lyngkot 20: Ka Seiñ-kyntu Sein?-raij 12 Daloi kan sa pynlong ïa ka lympung kaba 29 mynta u snem ha ka shnong Nongtalang kaba hap hapoh ka Amlarem Sub-Division West Jaiñtia Hills District kaba jngai kumba 16 km na Amlarem bad 42 km na Jowai, ka ban long ha ka 24 tarik bad 25 tarik mynta u bnai (Kyllalyngkot) 2026, ha ryngkat ka jingïatreilang ka Seinñ-Raij Nongtalang.
Kumta na ka liang jong ka seinñ-raij Nongtalang ka khot ka wer sngewbha ïa baroh ki nongïalam Seiñ-Raij bapher bapher bad kumjuh ruh ka khot sngewbha ïa baroh ki Daloi ki Pator, ki Langdoh ñiam na ki raij bapher bapher ba kin wan sha kane ka lympung.
Ka Seiñraij Nongtalang ka khot sngewbha kyrpang khamtam ruh ïa ki khun ka bri u Hynñiewtrep Hynñiewskum ri 12 daloi 30 syiem baroh ban sakhi ïa kane ka lympung.
Ka Seiñ-raij Nongtalang ha kajuh ka por ka khot ka wer sngewbha ïa baroh lang ki para ñiam kiba najan bad na jngai ban wan ïa shim bynta sha kane ka lympung khnang ban long kaba iphuh iphieng bad kaba jop.
Ha kane ka lympung kan don ki jingshad tynrai (Cultural Dance) bad ki jingsneng jingkraw na ki riew rangbah ban pynneh pynsah ïa ka ñiam ka rukom bad ka riti ka dustur.
