Nongpoh, K’Lyngkot 18 : Ka L.S Syiemlieh Production ka la pynbna ba kan pynlong biang ïa ka jingïakop pyni sap Ri Bhoi Super Star – Season 3 hapoh ka Ri Bhoi District, kum ka lad jingïarap bad ka rynsan ban sei madan ïa ki sap ki phong bapher bapher jong ki khun samla jong ka District.
Haba kren ïa kane sha ki lad pathai khubor, u Bah Stanwell Manih, Organizer jong kane ka jingïakop bad u Bah Lansius Syiemlieh, CEO ka L.S Syiemlieh Production, ki la ong ba kane ka rynsan kan plie lad tang ïa ki samla bad ki nongshong shnong jong ka Ri Bhoi District.
Ki la batai ba ka jingïashim bynta kan long lyngba ka online audition, ha kaba ki jingïashim bynta ki dei ban ring ïa ka video kaba ym duna ïa 2 minit, da ka mobile phone ne camera, bad phah sha u WhatsApp number 8787758104 na ka bynta ka jingïoh bishar ban rung sha ka jingïakop.
Na ka bynta ki kot ki sla, ki jingïashim bynta ki hap ban phah ïa ka EPIC card, bad lada kim pat don EPIC, kin phah ïa ka EPIC jong ki kmie ki kpa ryngkat bad ka Residential Certificate na u Rangbah Shnong, kum ka sakhi ba ki dei ki nongshong shnong jong ka District.
Ka L.S Syiemlieh Production ka la khot bad wer ïa baroh ki samla don sap ym tang ki samla hynrei wat kito kiba la heh ka rta ruh ba kin wan shakhmat ban pyndonkam ïa kane ka rynsan. La ong ba ka jingthmu ba kongsan jong kane ka prokram ka long ban ai rynsan ïa ki sap ki phong jong ki, ba kin ioh lad ban kiew sha kiwei pat ki rynsan ha ka jylla bad shabar ruh lyngba ka jingïarap jong ka L.S Syiemlieh Production.
