Plie paidbah ka MLA Sutnga-Saipung ïa ka madan futsal ha shnong Latyrke kaba la shna lyngba ka skim DMF

Khliehriat, k’Lyngkot 18: Ka MLA jong ka Sutnga-Saipung, ka kong Santa Mary Shylla kum ka kongsan ha ka jingdon ryngkat lang u Deputy Commissioner ka East Jaiñtia Hills District, u Shivansh Awasthi, IAS, u Block Development Officer (BDO), Saipung C&RD Block, Dr R. Pyrtuh, lem bad ki nongpynïaid shnong lem bad ki nongshong shnong hynnin ka sngi ka 16 tarik kyllalyngot, ka la plie paidbah ïa kawei ka madan futsal ha shnong Latyrke East Jaiñtia Hills District bad kane ka madan ka dei kaba wan lyngba na ka skim jong ka District Mineral Foundation (DMF).
Haba kren ha ka jingïalang, ka kong Santa Mary Shylla ka la pynkynmaw biang ïa ka jingdonkam ki madan futsal bad ong ba kane ka dei ruh kaba ka shnong Latyrke ka la pan naduh u snem 2024, ka pynpaw ka jingsngew kmen ba ka jingïoh ïa ka madan futsal ka la urlong, ka la pynsngew ruh ba kane ka madan futsal kaba ha shnong Latyrke ka dei kaba kham heh bad ka heh haduh 12,000 square feet bad ka dei ka madan futsal kaba heh duh ha East Jaiñtia Hills District namar kiwei kiwei ki madan futsal kina Don hapoh ka district ki don ka jingheh kaba tang 10,000 square feet, la ong ba ka jingpynheh ïa ka madan la shna ba ka lah ban dup ngiam bha ki nongialehkai kiba ïa shimbynta.
Ka kongsan ka la bynrap shuh shuh da kaba ong ba ka jingbuh ïa ki madan futsal ha ki shnong ki thaw ka long na ka bynta ka bha ka miat jong ki nongshong shnong ha kaba ïadei bad ka koit ka khiah, ban kyntiew ïa ka kam ialehkai sports, ka pynshlur ïa ki nongshong shnong bad ki kynhun kumjuh ruh ïa kito kiba la rangbah ba kin long smat, long sting khamtam ha ka por janmiet ban pynmlien ban ialehkai, ka kyntu ïa ka ka Managing Club bad ïa ki nong pynïaid shnong ba kin sumar bha ïa ka madan bad ban shim jingkitkhlieh ban dup ïoh ki lad lynti ban lah ban siew ïa ka bai bor ding bad ruh ban pynbha, pynbit pynbiang ïa ka madan.
Ka kyntu ruh ïa baroh ki tnat kiba ïa donbynta ba kin don ka jingiatylli bad jingïatreilang khnang ba kan long ka jingmyntoi ïa ki khun samla, namar ka jingialehkai sports ka kyntiew ïa ka koit ka khiah, ka long ruh ka lad ka kabu ïa ki samla ha ka jingkyrduh kam.
U Shivansh Awasthi, IAS u ai ka jingkhublei kitbok kitrwiang ïa ka shnong Latyrke ha kane ka jingplie ïa ka madan futsal bad ong ba kane ka dei ka madan futsal kaba khatwei kaba la shna lyngba ka skim DMF hapoh ka district bad ong ruh ba kane ka dei ka jingïohi jngai ka MAL kaba la lah ban pynurlong ïa kane ka madan.
U Deputy Commissioner, u la ong ba ka jingpynheh ïa ka madan ka dei halor ka jingïoh pdiang ïa ki jingaijingmut na ki nongialehkai kiba la ju ialehkai ha ki madan futsal ba ka donkam ban pyneh sa khyndiat ïa ka madan, u la ong ruh ba kane ka jingshna ïa ki madan futsal ka dei ruh ka jingiaid ryngkat bad ka jingïoh jngai jong ka sorkar jylla kaba don ka jingangnud ban kyntiew ïa ka kam ialehkai sports na ka bynta ka jingwan ka National Games ha u snem 2027.
U la ong ruh ba ka jingialehkai sports bad ka jingshna ïa ki jaka ialehkai sports kam dei tang ban kyntiew ïa ka jingbit jingbiang ka met ka phad hynrei ka plie lynti ruh ïa kito ki riew don sap bad kyntiew shuh shuh ïa ki sap ialehkai ba ki don, ban ïoh ban ai jinghikai bad ban long ka lad kamai.