SHILLONG, Kyllalyngkot 16: Ka Nongkseh Sports Social & Cultural Club ka la pynliem noh ïa ka kynhun ïalehkai barim jong ka lympung I-League, ka NEROCA FC jong ka Manipur da 4-0 kol ban pynthikna ïa ka jaka ha ka semifinal jong ka lympung ïalehkai phutbol kaba la tip da ka ‘11th All India Chief Minister’s Gold Cup International Football Tournament’ ha Jorethang, Sikkim.
Ka Nongkseh ka la jam sha ka jingïakhun Quarterfinal khlem u kapten jong ka u Hardy Cliff Nongbri, uba la shah weng noh hadien ba u la mynsaw ka shyntur ha ka jingïalehkai kaba la dep.
Wat hapdeng ka jingbym don u kapten ba pura, ka kynhun ka la pyni ïa ka jingïalehkai kaba ryntih bad kaba shyrkhei naduh kaba sdang hapoh ka jingïalam jong u Fullmoon Mukhim, uba la shimti ïa ka kyrdan kapten ha kane ka jingïalehkai.
Ka khyllipmat kaba la pynïakhlad ïa kine ki arliang mamla ka la jia ha ka por ba u Banpynkhrawnam Nongkhlaw u la lah ban thep ïa ka kol kaba itynnad na ka corner kick.
Ka Nongkseh ka la bteng ban tehlakam bad synshar ïa ka jingïalehkai bad ka jingmyntoi ka la jia biang tang shuwa ban jam sha ka por shongthait, ha kaba u kapten u Fullmoon Mukhim u la pashat ïa ka bol kaba thikna bha sha u Kynsaibor Lhuid, uba la pyndep ïa ka kamram ban pynjlan ar shah ïa ka kol lamkhmat, kata da 2-0 kol ha ka kylla step.
Da kaba pynneh pynsah ïa ka jingsynshar ha ka kylla miet, ka kol kaba lai ka la wan hadien ka jingbakla jong u nongap kol ka NEROCA FC, hadien ba ka bol ba u la kum pyllait ka la hap hajan jong u Batskhem Thangkhiew. Une u rangïalehkai pdeng um shym la pynsepei ïa kane ka lad bad thep ïa ka kol kaba lai na ka bynta ka Nongkseh.
Kaba la pynskhem ïa ka jingjop kadei ka kol kaba saw ba la thep da u Sheen Stevenson Sohktung hadien ba u la ïohpdiang ïa ka bol pashat kaba thikna na u Chanmitre Thma.
Ha kaba kut, ka jinglehkai ba kyrpang jong u Sohktung ha baroh ki liang ka la pynlong ïa u ban ïoh khur ïa ka khusnam Man of the Match.
Haba bishar sha ka liang ki Defensive, ka Nongkseh ka la long kaba skhem ha baroh kawei ka jingïakhun, ha kaba u nongap kol u Daraphun Talang u la lah ban pynpaw ïa ka jingtbit jong u da ki jingïada (save) ba kongsan haba donkam.
Nalor u rangap kol ba tbit, ka Nongkseh ka don ïa ki rangap dien kiba skhem kiba kynthup ïa u Arlangky Nongsiej, u Banpynkhrawnam Nongkhlaw, u Banshkem Mawlong bad u Mickyson Tangsong, kaba la pynthikna ïa ka jingjop kaba dei hok khlem da shah thep (clean sheet) ha ki ar tylli ki jingïakhun.
Hadien kane ka jingjop ha ka quarterfinal, ka Nongkseh SS&CC kan ïakhun pyrshah ïa ka kynhun ïalehkai trai-ri ka Red Panda FC ha ka semifinal kaba la buh ban long ha ka 18 tarik u Kyllalyngkot, ha ka por 2 baje nohphai sngi.
