Shillong, Kyllalyngkot 16: Ka Laitkor SC, ka lahduh ba bat ïa ka burom, ka la ïaid shakhmat ban rung sha ka semi final da kaba pynliem suk haduh 10-0 kol ïa ka Umrynjah ha ka Quarter final jong ka lympung Women’s Football League 2026, katba ka Rangdajied United ka la jop lyngba ka tie breaker pyrshah ïa ka Lawei SC.
Haba phai sha ka Quarter final ba nyngkong, la sakhi ïa ar ngut ki thei-ïalehkai jong ka Laitkor kiba la ïoh hat trik, ha kaba ka Iaraplang Nongrum (6′, 59′, 62′, 64′) ka la thep saw kol marwei, katba ka Tracy Rympei (17′, 23′, 41′) ka la pynkhihjar lai sien.
Kiwei pat ki kol la thep da ka Darishisha Kharlyngdoh (9′), ka Ribahunshisha Kharshiing (37′) bad ka Saralin Warlarpih (38′).
Baroh ar kidei ki kynhun kiba don ha ka Group A hynrei ka Laitkor ka la jop ïa ka jingïalehkai group stage lyngba ka walkover. Watla katta ruh, ka Umrynjah ka la leh kat ban biang ban rung sha ka Quaterfinal kum kawei na ki ar tylli ki kynhun kyrdan ba lai kiba kham tbit na ki lai tylli ki Group. Katba ka Laitkor pat ka la long ka nongjop jong ka Group A bad ka dei tang ma ka ka kynhun kaba la jop lut ïa baroh ki jingïalehkai ha kane ka samoi.
Ha ka jingïalehkai kaba bud, ka Lawei ka la pynkyndit ïa ka Rangdajied da kaba lamkhmat nyngkong ïa ka jingïalehkai lyngba ka kol jong ka Darishisha Ladong (17′) hynrei ka Eiladki Ksoo (46′) ka la pynïakhaid noh ha ka kylla miet.
Hadien ka por kaba 90 minit kam shym la lah ban pynïakhlad ïa ka jingïakhaid ka rai ïa ka nongjop la rah beit beit sha ka penalty shootout bad dei hangne ba ka RUFC ka la pynthikna ïa ka jingjop da 4-3 ban rung sha ka semifinal.
Ka Rangdajied ka la rung sha ka Quarterfinal kum ka kynhun kaba kynsai tam jong ka Group C, katba ka Lawei kadei kawei napdeng ki kynhun kyrdan ba lai, kaba na ka Group B.
Ki ar tylli ki Quarterfinal ba khatduh kin long ha kane ka sngi Saitjaiñ. Ha ka por 11 baje mynstep ka Lumparing kan ïakhun pyrshah ïa ka Nongthymmai bud sa ka Pay For Right pyrshah ïa ka New Challenger ha ka por 1:30 baje nohphai sngi.
