SHILLONG, Kyllalyngkot 16: Ka Youngstars bad ka AGES ki la pynjlan ïa ka jingïaid lynti jong ki sha ka semi final ha ka lympung Shillong Cricket League 3rd Division 2026 jong ka Shillong Cricket Association hadien ba ki la jop ïa la ki jong ki jingïalehkai Quarter final ba la long hynne ka sngi Thohdieng.
Ka Youngstars ka la lah ban pynliem noh ïa ka United Brothers da 81 ron ha ka Quarter final ba nyngkong, nangta ka AGES ka la jop pyrshah ïa ka NAWS da 5 wiket ban pynthikna ïa ka jaka ha ka semi final.
Ha ka jingïalehkai ba nyngkong, hadien ba jop ïa ka jingkynting pisa (toss) ka Youngstars ka la kam trai ban tied nyngkong. U Asik Alam (kamai 65 ron naki 30 bol) bad u Arav Baraily (51 ron naki 23 bol) ki la lamkhmat ha ka tied ban buh ïa ka thong kaba 219 ron bad tied pyndep haduh kaba kut jong ki 20 ober ba la mang bad hap tang 3 wiket.
Hadien nangta, ki nongkawang bol jong ka Youngstars ki la pyndep ïa la ka jong ka kamram da kaba pynkhyllem noh ïa baroh 10 wiket jong ka United Brothers tang na ka bynta 138 ron haki 17.2 ober. Kiba la seisoh ha ka boling ki long u Prateek Kumar Rajak (3/15 naki 3 ober) bad u Ayush (3/22 naki 3.2 ober).
Ha kaba kut u Arav Baraily u la khur ïa ka khusnam Man Of The Match hadien ba u la kamai 51 ron ha ka tied bad weng ruh 3 wiket ha ka boling.
Ha ka jingïalehkai kaba bud, ka NAWS ka la shah pynkut noh tang 119 ron naba khyllem baroh 10 wiket haki 19.1 ober, ha kaba u Sumit Paul (40 ron naki 45 bol) bad u Kamal Goshwami (12 ron naki 13 bol) kidei ki nongtied kiba la kamai bun ron.
U Rongsang Sangma jong ka AGES u la ïoh ban khur 2 wiket naki 3 ober bad ailad tang 19 ron, nangta ka kynhun ki nongtied ki la pyndep ban beh ïa ka thong ban kamai 120 ron da kaba pynsah sa 5 wiket ha kti haki 14.1 ober.
Kiba la lamkhmat ha ka tied ki long u Drabest Marak (34 ron naki 14 bol) bad u Bartha (33 ron naki 25 bol), hynrei ïa ka nam Player of the Match la khur da u Bobier Sangma hadien ba u la khur 1 wiket bad weng ïa lai ngut ki nongtied lyngba ka run-out.
