SHILLONG, Kyllalyngkot 14: Ka kynhun ïalehkai kriket jong ka Lawsohtun ka la khur ïa ka jingjop ha kawei na ki jingïalehkai ka lympung Cricket League 1st Division 2026 jong ka Shillong Cricket Association hadien ba ka la pynliem noh da 2 wiket ïa ka Metallica hynne ka sngi Balang.
Haba phai sha ka jingïalehkai, ka Metallica ka la kam trai ban tied nyngkong hadien ba jop ïa ka jingkynting pisa (toss), hynrei kane ka kynhun ka la shah pynkhyllem noh baroh 10 ngut ki nongtied na ka bynta 155 ron haki 39.2 ober. Dei tang u Nikhil Thapa uba la kham paw ha ka tied, da kaba kamai 44 ron naki 63 bol.
Katba na ka liang ki rangkawang bol jong ka Lawsohtun, u Klostar lyngdoh (3/27 naki 8 ober) bad u Edmund Dhar (3/32 naki 7.2 ober) ki la khur mar 3 wiket. Nangta haba wan ban beh ïa ka thong, ka Lawsohtun ka la pyndep ïa ka kamram da kaba hap 8 wiket ban kamai 156 ron haki 29.4 ober.
Kiba la lamkhmat ha ka tied na ka bynta ka Lawsohtun ki long u Kynsaibor Lyngkhoi (31 ron naki 30 bol) bad u Klostar Lyngdoh (41 ron naki 38 bol), uba la khur syndon ïa ka khusnam Player Of The Match.
