Pynrem jur u Marcuise ïa ka jingleh riew khlaw ki briew ba pynïapïa u dkhot jong ka ACHIK

Shillong, K’Lyngkot 10: U Myntri sorkar ba peit ïa ka tnad PHE uba dei ruh u MLA ka NPP na Williamnagar u Marcuise N Marak u la pynrem jur ïa ka jingshah thombor ïa u wei u dkhot seng bhalang jong ka ACHIK ha Rajabala kaba hap hapoh West Garo Hills District, da kaba ong ba ka dei ka jingleh riew khlaw bad ka jingthombor ïa ka shongsuk shongsaiñ, ka synshar paidbah, bad ka jingsynshar aiñ.
Ha ka kyrwoh khubor ha ka sngi Saitjaiñ, u Marak u la pynpaw ïa ka jingsngewsih kaba jur halor kane ka jingjia bad u la ong, “Nga pynrem jur ïa ka jingleh donbor da ki riew sniew bym lah ban ithuh ïa ki dkhot jong ka seng bhalang jong ka ACHIK ha Rajabala ha West Garo Hills District.Kum kine ki kam riew khlaw kan ym don jaka ha ka imlang ka sahlang namar ba kane ka ktah ïa ka shongsuk shongsain”.
U Marak u la kyntu ïa ki bor ba dei peit ban shim khia ban lap bad ban pynngat ïa ki nongleh kam sniew ha ka ain.
“Nga la ïakynduh hi ïa ka bor synshar district bad ki bor ba dei peit bad nga la kyntu ïa ki ban shim khia kloi bad shim rai tyngeh ban lap ïa ki nongleh kam sniew bad ban pynthikna ba kin shah pynngat ha ka aiñ kloi katba lah,” ong u Marak.
Shuh shuh u Marak u la ai ruh ka khubor jingsngewlem sha kiba haïing hasem jong u dkhot ka ACHIK u Dilseng M. Sangma, uba la duh noh ïa la ka jong ka jingim ha katei ka jingjia.
“Ka jingsngewlem jong nga ka leit sha kiba haïing hasem jong u Dilseng M. Sangma, uba la khlad noh namar ka jingmynsaw jong u. Ka jingkhlad noh jong u khlem dei por ka long ka jingduh kaba khraw, bad nga ïeng ha ka jingïatylli bad kiba haïing hasem jong u, ki paralok, bad ka seng ACHIK ha kane ka khyllipmat jong ka jingsngewsih kaba jur,” u la ong.
U Marak u la kyrpad ia ki paidbah ba kin long kiba jaijai bad ban pynneh ia ka jingsuk, da kaba pynthikna ba ïa ka hok yn sa ïoh.
“Nga kyrpad ïa ki paidbah ba kin long kiba jaijai bad ban pynneh ia ka jingsuk, katba nga pynthikna ba yn ym pyllait im ïa uno uno u briew uba donkti ha kane ka kam thombor.Ka hok ka dei ban jop, bad ka jingshngain jong ki nongshong shnong jong ngi ka dang long kaba kongsan tam,” u la ong.