SSA Women’s Football League 2026: Bteng ka New Challenger & Laitkor ïa ka jingjop ba paka
Mad ka Lawei SC ïa ka jingjop ba nyngkong.
SHILLONG, Kyllalyngkot 08: Ka New Challenger SC bad ka Laitkor SC ki la bteng ïa ka jingjop ba paka sha ka ar sien lynter ki jingïalehkai ha ka lympung Women’s Football league 2026 jong ka Shillong Sports Association ba la long hynne ka sngi Palei (08 tarik K’lyngkot) ha madan First Ground-SSA Stadium, Polo.
Ha kawei pat ka jingïakhun ka Lawei SC ka la ïoh ban khur ïa ka jingjop ba nyngkong da kaba pynliem noh da tang 1-0 kol ïa ka Mawkasiang SC. ïa kane ka shi kol la thep da ka Lavinia Lyngkhoi (69’).
Kane ka jingjop ka la pynlong ïa ka Lawei SC ban kamai 3 point hadien ar tylli ki jingïalehkai ha ka Group-B, katba ïa ka Mawkasiang SC kane kadei ka jingshah rem kaba ar sien naki ar tylli ki jingïalehkai.
Ka New Challenger SC ka la pynliem noh da 3-0 kol ïa ka Nongrim hills SC ha ka jingïalehkai ba nyngkong, ha kaba ka Pynibha Rangthaluh ka la pynkhihjar ar sien (15 & 43’) katba ïa kawei la thep da ka H Lyngdoh (51’).
Da kane ka jingjop ka New Challenger SC ka la ïoh ban kamai 6 point naki 2 sien ïakhun bad kiew sha ka kyrdan ba nyngkong ha ka Group-C.
Ka jingjop kaba khraw tam ha kane ka sngi ka long ïa ka Laitkor SC, ha kaba ki la thep haduh 9-0 kol ïa ka Mawshubuit SC ban khur ïa ka jingjop kaba ar sien lynter ha ka Group-A bad ruh ban pynskhem ïalade ha ka kyrdan ba nyngkong.
Ka Rympei B Syiemlieh (24 & 48’), ka Ibakordor Wahlang (27 & 33’) bad ka Tracy Rympei (30 & 43’) ki la pynkhihjar mar ar sien na ka bynta ka Laitkor, katba kiwei pat ki kol la thep da ka Cynthia M Umlong (22’), ka Saphipaia Lyngdoh (41’) bad ka Daaijingsuk Basaiawmoit (45’).
Ka prokram ïalehkai jong ka SSA Women’s Football league 2026 ha kane ka sngi Thohdieng (09.01.2026), ha ka por 10:30 baje mynstep ka Kharang SC kan aireng pyrshah ïa ka Rangdajied United FC (Group-C); ha ka por 12:30 baje mynsngi ka Umrynjah SC kan ïakhun pyrshah ïa ka Nongthymmai SC (Group-A); nangta ha ka por 2:30 baje nohphai sngi ka Lumparing SC kan ïakhun pyrshah ïa ka Lawsohtun SC (Group-B).